Paletwa Pawng ah Bomb a Puak, Minung Pakhat Hliamhma Pu

| The Chin Journal | Hakha, Chin State

Chin ramkulh, Paletwa peng ah nihin zinglei ah bomb puahnak a chuak i minung pakhat hliamhma a pu, tiah thawng kan theih.

Bomb a puahnak hmun hi Paletwa khua nichuahlei kap, Paletwa khuathar lei kalnak lam ah a ummi Myo-Oo Pura pawng ah a si, tiah Chin ramkulh sipin vuanci U Soe Htet nih a chim.

Bomb a puahnak hmun he aa hlat tuk lonak tlang cung ah Kawl ralkap bu Kha La Ya No. 289 sakhaan zong a um, tiah Paletwa zatlangbu hruaitu U Aung Kyaw nih a chim.

U Soe Htet nih, “Bomb puah kong ah ahote tuahmi bomb puahnak dah a si timi chim awk ah a har rih. A tlangpi in cun ahote tarhmi bomb a si timi hi ruahdamh khawh pah cu a si ko. Asinain, fian huaha loin vun puh cu a tha lo,” tiah a chim.

Paletwa peng ah AA le Kawl ralkap kahdohnak 2016 in a rak i thawk i atu tiang kahdohnak tete a um pah tawn zungzal.

Atu bantuk in bomb hmenhmi i lamh sual ruang ah Chinmi hliamhma a pumi an um len bang in a thimi minung 3 hrawng zong an um cang, tiah theih a si.

-The Ladies News

Latest News