Paletwa ah Facang Kuat an Timhmi Tlamtling Lo, an Ngol Chung

| The Chin Journal | Hakha, Chin State

Paletwa ah facang kuat ding in Chinmi zatlangbu hna le mino hna nih an i zuam len nain tlamtlinnak a um lo caah an ngol chung tiah theih a si.

Salai Isaac Khen nih, “Paletwa facang kuat ding in ni 2, ni 3 chung an i zuam len nain tlamtlinnak a um lo caah an ngol chung. Asinain, kuat khawh a si nakhnga kan i zuam rih ko lai,” tiah a chim.

“Nihin zing ah Kawl ralbawite he kan i tong i, Sami in Paletwa karlak lamtanttim tiang cu ttuanvo kan in lak khawh hna lai a kan ti. Asinain, Paletwa tiang kal cu atu ah cun a si kho rih lo a kan ti,” tiah ralzam bawmh kong ah Sami ah a phanmi upa pakhat nih April 12 ah The Chin Journal ah a chim.

Sami khua ah Taungyi Chin mibawmtu, Hakha mino, Falam mino le David Lai te an phan.

Hakha mino nih cun Paletwa le Rakhine lei cu tangka fang in bawmhnak an kuat cang hna i Falam mibawmtu pawl hi Paletwa tiang kal ding in ahmasa ah khan timhtuahnak an ngei.

Falam mino pawl nih ralzam caah facang tun 200 leng zong an phorh. Asinain, Sami le Paletwa karlak ah AA cawlcanghnak a um ruang ah kal kho loin an i hreng ko.

Paletwa khuachung ah nitin in ralzam thar an phan i, atu ah cun ralzam 3,000 leng an si cang.

Paletwa khua eidin tirawl phorhnak lampi pawl an pih dih caah facang cawk awk zong a um ti lo tiah Paletwa ralzam mibawmtu ah aa telmi pastor pakhat nih a chim.

“Nizan tiang ah khan Paletwa ah ralzam 3,000 leng an phan cang. Nitin in an rak phan. Asinain, eidin lei ah harnak an tong tuk. Facang hi tun khat ah 70,000 hrawng a si nain cawk awk a um ti lo. Hiti ning cun thaizing hmanh ah ti lo rawl loin Paletwa hi a um khomi a si,” tiah a chim.

Sami ah ralzam bawmhnak facang le sii-ai tibantuk pawl cu aa pong nain Paletwa lei ah lanhpi khawh a si lo caah lungrethei vansang in an um ko hna.

Latest News

News in Burmese