Nupi Thit Ruah ah Si Loin Chungkhar Tlawn Bak ah Laitlang Ka Tlung: Salai Phua Thawng

| The Chin Journal | Hakha, Chin State

Chinmi lawng nih si loin Myanmar rammi zong nih an theih ngai vemi hlasa Salai Phua Thawng nih atutan Chinram a rak tlunnak aruang a hun langhter.

Salai Phua Thawng cu March 27 ah khan US in Myanmar ram ah a rak phan i a chuahkehnak Matupi i a chungkhar sin ah caan sau nawn a vung um.

Matupi peng, Ruava khua ah tuahmi Zotung Mino Tonpumhnak Puaipi zong ah hlasaknak in caan a vung hmanpi khawh hna.

Salai Phua Thawng nih, “Atutan ramdang in a rak tlungmi hi minung 30 hrawng cu kan si lai. A dang cu nupi an ngei dih. Keimah le ka hawipa lawng hi nupi a thi lomi kan si ko rua,” tiah Yangon khua i Vegar Star Hotel ah The Chin Journal he tonnak ah a chim.

“Atutan kei ka rak tlunmi hi nupi thit ruah ah a si lo. Ka chungkhar tlawn ruah hrimhrim ah a si,” tiah a chim chap.

Salai Phua Thawng cu Yangon ah a hun kir cang i tutan zarh chung ah US lei ah a lan te lai.

“Caan karlak chung cu kanmah Zotung hla deuh kaa chuah. DVD phel zong in Zotung hla ka rak i chuah,” tiah a cawlcangh ning a langhter.

Aluancia 2012 ah khan “Toyota” timi Kawlhla a rak i chuah i cu hla in cun mipi nih an rak theih ngaingaimi a si.

Chinmi lawng nih si loin Myanmar ramchung tlangcungmi le Kawlmi zong nih Salai Phua Thawng hi “Toyota” hla in Chin hlasa tiah an theihmi a si.

Latest News