“Nu” Ruang ah Pu Ngun Khuai nih Pu Chan Hre Meithal in a Kah: Meithal Kahnak Phen Konglam

| The Chin Journal | Hakha, Chin State

May 1 ah a cangmi Thlantlang peng, Bungtlang khua i kum upa minung karlak meithal in i kahnak kong ah The Chin Journal nih kan hlat khawh tawk ah hi thahnawnnak hi “Nu” ruang ah a si, tiah kan theih.

Hi thahnawnnak kong he pehtlai in Thantlang palik zung voi tampi kan chawnh nain phone line a ttha lo i, kan pehtlai kho lo. Asinain, Bungtlang khuabawi Pu Rual Thang kan pehtlaih khawh i, amah nih thil sining dikthlir in a chimh.

A nunnak a liammi Pu Chan Hre (kum 51) hi Pi xxxx he fa pahnih an ngeih hnu ah an rak i tthen. An i tthen hnu ah Pu Ngun Khuai (kum 60) he hin an rak i um i, fa pali an ngei.

Pi xxxx hi Pu Ngun Khuai he fa pali an ngeih hnu ah an i tthen tthan i, ahlan a va a simi Pu Chan Hre he an i um tthan.

Khuabawi Pu Rual Thang nih, “Pu Chan Hre he an i um tthan zong ah hin phungning tein le kap hnih hnatlaknak tein an i um tthanmi a si ko,” tiah a chim.

Asinain, Pu Chan Hre nupi Pi xxxx cu April thlathih lei hrawng ah khan Pu Ngun Khuai he an phohpian tthan.

Cucaah, Pu Chan Hre nih a nupi auh awk ah a hawi pakhat he Pu Ngun Khuai inn ah an vung kal. Asinain, Pu Ngun Khuai le Pi xxxx cu inn ah um loin khualeng lei ah a ummi inn pakhat (Botay) ah meithal he an rak zaam.

Khuabawi Pu Rual Thang nih, “Kan khua ah zu a tam tuk i, Pu Ngun Khuai a umnak inn check ding in kan vung kal. A ngaingai ah zu check ah kan kalmi a si. Asinain, zu kan check lio ah Pi xxxx cu ihkhun tang ah a rak i thuhmi kan hmuh,” tiah a chim.

May 1 zaan ah Pu Chan Hre nih a nupi auh ding in amah lawng in a vung kal i innchung a luh manh hlan inntual ah Pu Ngun Khuai nih meithal in a rak kah hi a si.

Bungtlang khuami cheukhat thil sining a theitu nih, “Pu Chan Hre nih hin thirfung in a vung kal hnawh hna i, Pu Ngun Khuai nih meithal in a rak kah ve hi a si,” tiah an chim.

“Pu Chan Hre ruak cu zanttim sml. 12:30 hrawng ah kan vung char i a thaizing May 2 ah kan vui,” tiah khuabawi Pu Rual Thang nih a chim chap.

Pu Chan Hre meithal in a kaptu Pu Ngun Khuai hi khawzei hmanh ah tlikzaam loin amah tein palik sin ah a ap ve.

Mithah lainawnnak pohmah (302) in case on a si i, an case cu Hakha District biacieh zung ah ap a si.

Pi xxxx hi biaceih zung tehte ah dir ding in an fial ko nain amah pumpak le a ttale nih atu tiang cu an lung a tling rih lo, tiah khuabawi sin in kan theih.

Latest News

News in Burmese