Nu-ei le a Pa nih Cincik in a Hrenmi Kum (13) Ngakchia Pa an Khamh

| The Chin Journal | Hakha, Chin State

Thailand ram, Satun peng, Kuan Kalong timi khua i Khaihriat/Raba dum chung ah a nu-ei le a pa nih cincik in an hrenmi kum (13) ngakchia pa cu September 25 ah zatlangbu hna le palik nih an vung khamh, tiah theih a si.

Ngakchia pate cu a orhlei kee ah cincik in an hren i khoika hmanh ah kal kho lo dingin thinkung nganpi ah cu cincik cu an tem.

Satun palik le zatlangbu hna nih an vung kal hnawh lio ah ngakchia pa i a nu-ei Phonnaphat Noon (kum 47) cu an innhmai ah ti a rak i kholh.

Thailand ngakchia pa a nu-ei nih cincik in thingkung ah a hren

Cun ngakchia pa i a pa Kitisak Chaiboonjun (kum 37) cu innchung ah a rak it ve. Palik an ra timi ngakchia pa i hringtu pa nih a theih tik ah lau lengmang in innleng ah a run chuak.

Ngakchia pa a nu-ei le a pa cu palik nih an tlaih hna. Ngakchia pa zong palik zung ah an hruai ve.

Palik zung an phak lecangka in kutka pawng ah a ummi hmunthur bawm cu ngakchia pate nih a zuan hnawh i a chung i eidin an hlohmi pawl cu a lak i a ei hna.

Palik zung kutka hram i hmunthur bawm ngakchia pa nih a zuan hnawh i hlonhmi eidin pawl a ei

Ngakhia pa nih hmunthur bawm chung i eidin pawl a eimi zatlangbu riantuantu hna nih an hmuh tik ah an lung a kuai hringhran.

Ngakchia pa a nu-ei le a pa cu palik nih bia an hal hna tik ah, “Chim a har chin thluahmah i cawnpiaknak ah atu bantuk in kan hren hi a si. Faak piin zong kan tu lo. Fung a famite lawng in chimhrinnak menmen ah kan tuk. Cun, lungtlamtlinglo a si caah hmundang ah amah duh in a vakvai lai ti kan phan caah atu bantuk in kan hren hi a si,” tiah an chim.

Thailand ngakchia pa a nu-ei nih cincik in thingkung ah a hren

Ngakchia pa cincik in hren a tonmi hi innpa nih an hmuh i palik zung le zatlangbu pawl sin ah theihternak an tuah hnu ah atu bantuk in palik nih an tlaih hna hi a si.

Ngakchia pa cu palik zung ah ti an kholh, eidin le thilpuan an pek hnu ah sizung ah an kalpi i ngandamnak lei checknak an tuah.

Hlathlainak pehzul in tuah awk ah ngakchia pate cu a nu-ei le a pa si ah umter loin ngakchia zohkhenhtu zatlangbu nih an zohkhenh chung, tiah theih a si.

-Siam Eagle News, SAW

Latest News