North Korea: US Nih a Dirhmun a Thlen Lo Cun Bia Kan i Ruah Ti Lai Lo

| The Chin Journal | Hakha, Chin State

US nih North Korea ram kong he pehtlai in a kalpimi a dirhmun a thlen lo ahcun Nuclear ralhraim kong ah biaruahnak kan ngei ti lai lo, tiah North Korea nih May 24 ah thawngthanhnak a tuah.

North Korea cozah thawngzamhnak hmang in atulio US nih nih a kalpimi dirhmun cung ah North Korea nih a lungtlin lonak a hun langhter hi a si.

Atulio US President Donald Trump chan ah North Korea he hmaitonh biaruahnak voi hnih an ngei cang.

Singapore ram ah President Trump le North Korea hruaitu Kim Jong-un cu avoi khatnak an rak i tong i cu lio ah cun tlamtlin lei a rak panh.

Asinain, naite Vietnam ram ah avoi hnihnak tonnak an hun ngaih than tikah thil sining rawhralnak lei ah fak khun in a hun panh than.

Vietnam tonnak lio ah North Korea nih a ngeihmi nuclear ralhraim cheuchum ap ding in US nih a hal. North Korea nih US dantatnak vialte hlihphoihpiak dih ding in a hal ve.

Asinain, nuclear ralkap ap timi cu North Korea nih a cohlan khawh lo bang in US zong nih atulio North Korea cung i a khinhmi dantatnak vialte hlihpoihpiak dih colh cu a colang kho ve lo.

Cucaah, Vietnam biaruahnak cu caan rau lo te ah tamtlinnak hmu loin an rak ngol colh.

Cu hnu in cu US le North Korea karlak entainak a thar in aa sem than i North Korea zong nih Ballistic Missile hneksaknak a hun tuah than ve.

-ABC, Reuters

Latest News