North Korea Nih Rocket Bomb Pawl Rili Chung ah a Kah Than

| The Chin Journal | Hakha, Chin State

May 4 zinglei ah North Korea nih raldohnak cawnnak pical ngaiin a tuah i nichuahlei rili chung ah rocket bomb tampi a kah than, tiah theih a si.

North Korea cozah thawngzamhnak KCNA nih, “Atu zing raldoh cawnnak pumpak in a vung zohtu kan hruaitu Kim nih kan ralkap pawl thilti khawhnak a hmuh tikah a lung a hmui hringhran,” tiah a langhter ve.

Atu bantuk in North Korea nih rocket pawl a kah thannak hi US he hnatlaknak an rak ngeimi cung ah le naite Vietnam ram i US-North Korea tonbiaruahnak a tlamtlin lo ruang ah a lungput a langhter bia a si kho, tiah a ruatdamhtu zong an um.

South Korea cozah nih, “North Korea nih rocket pawl a kah thanmi kong ah kan lungre a thei. South-North Korea ram hnih karlak i entainak vialte hloh dih ding in hnatlaknak kan ngeihmi bantuk tein North Korea nih a zulh awk a si,” tiah cathanh an chuah.

South Korea’s Joint Chiefs of Staff nih, “Nichuahlei rili, Wansan hmunram pawng he a naihnak pawng ah North Korea nih rocket bomb tampi a kah. An rocket bomb pawl cu meng 125 tiang an zuang. Atutan an kahmi North Korea rocket pawl nih South Korea khualipi cu an phan kho theng lai lo,” tiah a chim.

-ABC News

Latest News