North Korea Nih Missile a Kah Hnu ah US Nih Meng 7,000 a Zuangmi Missle a Kah Ve

| The Chin Journal | Hakha, Chin State

Cacawn nili ah North Korea nih lamnai a zuang khomi Missile pawl a kah hnu ah US zong nih meng 7,000 tiang a zuang khomi Missile a kah ve, tiah theih a si.

US rampi rungvengtu ralkap zungpi Pentagon chimnak nawlngei Laura Seal nih, “Cape Canaveral pawng rili chung in USS Rhode Island tiah auhmi tichungkal raldohnak tilawng (Submarine) nih a par ah bomb tarh lomi Trident II (D5) Missile cu hneksaknak ah a kah,” tiah a fehter.

Rili tang ah a um buin USS Rhode Island tichungkal tilawng nih Trident II (D5) Missile a kah hi a si.

A kahmi missile cu Atlantic rili cung in meng 7,000 tluk a zuang i Africa vawleithen pawng i rili chung ah a vung tla.

“Kan ralhriam pawl pehzul in hman awk an that le that lo hneksaknak ah kan kahmi a si. Hneksaknak kan tuah tinte theihhngalhnak le thiamnak lei in ruahnak thar a kan pek zungzal,” tiah Laura nih a chim chap.

-Fox News

Latest News