NLD Chan ah Biaknak Lei nih Bawmhnak Zong Kan Hmu: Rev. Dr. Za That

| The Chin Journal | Hakha, Chin State

Ahlan cozah chan ah a rak um ballomi acozah lei bawmhnak zong NLD cozah chan ah cun biaknak lei nih kan hmu kho i NLD cozah cung ah kan i lawm, tiah CACC General Secretary Rev. Dr. Za That nih lemcang Zen Gyi hruainak in tuahmi video interview ah a langhter.

Lemcang Zen Gyi te nih an tuahmi interview video cu nizan ah amah Zen Gyi pumpak nih a Facebook ah a tar i a zohtu zong an tam ngaingai.

Cu video ah cun NLD cozah chan ah Hakha khuachung ah zei bantuk tthanchonak dah a um timi kong pawl abikin an langhter.

Biaknak lei kong he pehtlai in Rev. Dr. Za That nih, “Atu NLD cozah chan ah Biakinn saknak ah acozah nih tangka a kan bawmh. Kan lung aa lawm hringhran. TABC GS ka rak ttuan lio zong ah biaknak lei inn sak nakding acozah sin ah bawmhnak ka rak hal i, ting 550 a rak kan bawmh,” tiah a chim.

“Ahlan ah cun hi bantuk bawmhnak hi a rak um ballo. NLD cozah chan ah sok khawh a si tiah an timi thawngpang kan theih i, ramkulh cozah le ramkomh cozah sin ah kan sok. Kan sokmi a pahnih ning in kan hmu. 2015-2020 karlak NLD cozah chan ah Hakha, Falam le Thantlang kan zoh tik ah ahlan cozah chan nakin tthanchonak a rang deuh tiin ka hmuh,” tiah a chim chap.

NLD cozah nih 2020-2025 tiang hi acozah tlai kho rih sehlaw kan i ruahchanmi Federal zong hi kan hmu lai tiah ka zumh ko, tiah Rev. Dr. Za That nih biaruahnak ah a langhter.

Latest News

News in Burmese