Ningcang Phun 5 in Kawlram Chung Sianginn On a Si Lai

| The Chin Journal | Hakha, Chin State

July 21 thawk in Myanmar ramchung fimcawnnak sianginn on ding in timhtuah a si cang i, sianginn kai ningcang belte nincang phun 5 in tthen ding in timhtuah a si.

July 21 ah taang-9 le taang-10 hi on hmasa a si lai i, a tanglei ningcang phun 5 bantuk in sianginn cu on a si lai:

(1) Ahlan ningkel bantuk in kai khawhmi sianginn, (2) Zarh khat dan in kaimi sianginn, (3) Sianginn kai caan caan 2 ah tthen i (2 Shifts), cacawn i chaan in kaimi sianginn (Abiana ah, zinglei ah bu khat, zaanlei bu khat tbk.), (4) Sainginn kai caan caan 2 ah tthen i, zarh khat dan in kaimi sianginn, (5) Sianginn on tthannak ca ah harnak a tongmi sianginn hna tiin phun 5 in tthen a si.

“Siangngakchia an tlawmnak sianginn pawl cu ahlan ning tein an kai ko lai. Siangngakchia an tamnak sianginn ah cun ni khat ah phu hnih in tthen i, i chawng in an kai lai. Asiloah, zarh khat ah nithum chung kai tibantuk in kan tuah lai. Siangngakchia 5,000 le 6,000 hrawng an umnak sianginn ngan pawl ah cun phu hnih ah kan tthen hna i zinglei zaanlei i chawng in an kai ko hmanh ah an tam tuk caah a si thiam lo. Cucaah, zarh khat dan in an kai a hau lai,” tiah Myanmar ram fimcawnnak zungpi Executive Director U Ko Lay Win nih 7Day News Journal ah a chim.

July 21 ah taang-9 le taang-10 an on hmasa lai i a tlamtlin ko ahcun zarh hnih hnu (August zarh hnihnak) ah Middle School pawl on an si lai.

Middle School an on hnu zarh khat (August zarh thumnak) ah Primary School pawl on ding in timhtuah a si.

Sianginn on kaa ah alak in phawtmi Text Book le cattialnak cauk pawl phawt an si te lai i, siangngakchia le saya/mate zapi ca ah Mask le Face Shield zong phawt cio an si lai.

COVID-19 pulrai ruang ah atu bantuk in sianginn kai ningcang an thlen hi a si i, siangngakchia le sayate nih COVID-19 caan chung zulh dingmi phunglam thar zong chuah ding in Myanmar ram fimcawnnak zungpi nih timhtuahnak a ngei.

Latest News

News in Burmese