/

March 3 Myanmar Lamzawhnak ah Minung 38 Nunnak a Liam

The Chin Journal | Hakha | Chin State

Zing sml. 9:00, March 4 | March 3 ah Myanmar ram huap in palik le ralkap kut cung in lamzawhtu Myanmar rammi minung 38 an nunnak a liam, tiah UN nih a fehter.


Zaan sml. 9:00, March 3 | Yangon, Mandalay, Minchian, Salin, Mongywa le Mawlamaing ah a nunnak a liammi an um hna. Atu tiang ah minung a tlawm bik 23 an nunnak a liam, tiah an fehter. (Myanmar Now)


Zaan sml. 8:00, March 3 | Myanmar ramchung Media pical pawl nih an fehter khawh ning ah atu zaan sml. 8:00 hrawng tiang ah a tlawm bik minung 15 an nunnak a liam, tiah an langhter.

Mandalay ah minung 3 an nunnak a liam i meithal kahnak in hliamhma a pumi a tlawm bik minung 10 zong an um.

Yangon, North Okkalapa ah palik le ralkap nih mei an khangh pin ah meithal in an kah chap hna caah minung 3 an thi, tiah atu tiang ah an fehter khawh.

North Okkalapa ah hin meithal sawhsawh si loin ralram raldohnak Machine Gun in an kah hna caah minung tam tuk an hliamh hna.

BBC nih cun North Okkalapa ah hin minung 11 a nunnak a liammi an um kho men, tiah khuami hna chimmi cherhchan in a langhter. (Asinain, fehter awk a ttha rih lo).

Mongywa ah minung 5 an nunnak a liam i hliam fak a tuarmi zong an um hna. Salin ah minung 2, Magwe ah minung 1, Minchian ah minung 1 tiin an nunnak a liam hna.

Nizan Kalay lamzawhnak ah an kahmi tlangval pakhat zong nihin zanlei ah a nunnak a liam ve.

Nihin ni khat lawng ah hin Myanmar ram huap in minung 25 hrawng an nunnak a liam kho tiah ruahdamh a si i, fehter khawh ding in an i zuam cuahmah lio a si.

Note: Atu tiang ah minung 15 leng an nunnak a liam cu a fiang cang. Asinain, a thimi hi an i chap kho. Mah ka cakuang ah hin kan rak update tthan lai.

Cherhchan: Irrawaddy, DVB, BBC, Mizzima, Myanmar Now

THE CHIN JOURNAL

The Chin Journal Internship Program ah Thantlang le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.