Nihin Myanmar: Nihin Myanmar ah a Cangmi Thawngpang Pical Pawl

| The Chin Journal | Hakha, Chin State
  • Thailand: Myanmar Ralkap kan Theihpi/Tanpi Tinak a Si Lo
  • Myanmar Ralkap Uknak Chuh Hnu Minung 8 Nunnak Liam
  • Red Cross le Daw Suh Tong Kho Ding in CRPH aa Zuam Lai
  • Facebook nih Ralkap he aa Pehtlaimi Account Vialte a Thah Dih

Thailand: Myanmar Ralkap kan Theihpi/Tanpi Tinak Si Lo

Myanmar ralkap palai he tonnak kan ngeihmi hi Thailand nih Myanmar ralkap cozah kan theihpi (Endorse) tinak a si lo, tiah Thai Prime Minister Prayut Chan-o-cha nih February 25 ah a chim.

February 24 ah Indonesia ramleng vuanci Retno Marsudi le Myanmar ralkap ramleng vuanci U Wanna Maung Lwin cu Thailand ram ah tonnak an ngei.

Thai Prime Minister Prayut nih, “Tonnak ah U Wunna Maung Lwin biachim deuh kan ngai,” tiah a chim.

Cun, Myanmar ram buaibainak kong chimphoihnak rian ah Indonesia ram bantuk in Thailand cu kan i tel lo, tiah a langhter fawn.

“Myanmar ramkhel kong cu Myanmar rammi hna nih anmahte in chimphoh ding rian a si. A rannak bik in Democracy uknak lei ah kar an hlah khawh nakhnga thazaang pek ka duh hna,” tiah Prayut nih a chim chap. (Channel News Asia, Nikkie Asia)


Myanmar Ralkap Uknak Chuh Hnu Minung 8 Nunnak Liam

February 1 ah Myanmar ralkap nih NLD kut cung in uknak an chuh hnu ah rammi minung 8 ralkap le palik kut in an nunnak a liam cang, tiah theih a si.

February 8, Mandalay khua ah kum 32 a simi Ko Ko Oo cu khuachung runvennak a tuahmi palik motor nih a pah caah a nunnak a liam.

February 9, Naypyidaw lamzawhnak ah kum 19 a simi Ma Myah Thwe Thwe Khaing cu palik pa nih meithal in a lu ah a kah caah a nunnak a liam.

February 15, Meik khua ah kum 18 a simi tlangval no Nay Nay Win Htet cu zaan sang chung runvennak a tuah lio ah palik nih a lu ah an tuk i, a nunnak a liam.

February 20, Mandalay khua ah kum 17 lawng a simi tlangval no Wai Yan Tun cu lamzawhnak ah palik nih a lu ah an kah ruang ah a nunnak a liam.

February 20, Mandalay lamzawhnak ah kum 48 a simi Ko Kyi Soe cu palik nih a lu ah an tuk caah a nunnak a liam.

February 20, Mandalay ah lamzawhnak a tthentu palik nih mipi a tukvelh hna lio ah kum 37 a simi Ko Thet Naing Win cu ralkap Sniper nih a thinhmaka ah meithal in a kah caah a hmun ah a nunnak a liam.

February 20, Shwe Pyi Tha (Yangon) ah zan sang chung runvennak a tuahmi kum 37 Ko Tin Htuat Hein cu palik nih motor cung in a cal ah meithal in an rak kah caah a nunnak a liam.

February 24, Mandalay lamzawhnak ah tlaih a tongmi kum 24 Ko Yaza Aung cu palik nih an hren lio ah a nunnak a liam.

A cunglei minung 8 hi ralkap uknak chuh buaibainak he pehtlai in palik le ralkap kut in a nunnak a liammi lawngte an si hna. (RFA)


Red Cross le Daw Suh Tong Kho Ding in CRPH aa Zuam Lai

Daw Aung San Suh Kyi le President U Win Myint telh in tlaihmi vialte International Committee of the Red Cross (ICRC) nih a ton khawh hna nakhnga Committee Representing Pyidawngsu Hluttaw (CRPH) nih aa zuam lai, tiah theih a si.

Uknak chuttu ralkap nih an tlaihmi pawl an hren hnanak hmunhma le ngandam in an um le um lo kong pawl zong ICRC nih a theih nakhnga CRPH he February 25 thawk hin an ttuan tti lai.

Daw Suh le President Win Myint cu sualphawtnak pohma pawl in tazacuai an si i, an sihni pawl he zong pumpak in tonnak nawl ralkap nih an pe hna lo.

Cu lawng si loin a dang ramhruaitu tlaihmi vialte zong an hren hnanak hmunhma theih an si lo i, ngandam in an um le um lo zong theihfian a si lo. (BBC)


Facebook nih Ralkap he aa Pehtlaimi Account Vialte a Thah Dih

Myanmar ralkap he aa pehtlaimi Facebook Page le Account vialte kah thahpiak dih hna, tiah February 24 ah Facebook Company nih phung ning in thawng a thanh.

“February 1, Myanmar ralkap nih uknak a chuh hnu ah mi nunnak hloh tiang in hranhramnak (Violence) an tuah ruang ah atu bantuk in kan Ban hna hi a si. Myanmar ralkap nih Facebook le Instagram an hmanmi hi mipi ca ah ttihnung a si tiah kan hmuh,” tiah Facebook nih thawngthanhmi ah an langhter.

Facebook nih Myanmar ralkap he aa pehtlaimi Page a hnawhmi chung ah MWD, MRTV, MRTV-Live, Tatmadaw True News Group le Ministry of Home Affairs timi Facebook Page pawl an i tel hna.

A cunglei Page pawl leng ah Myanmar ralkap he aa pehtlaimi Page dangdang le pumpak Account tampi zong Facebook nih a hloh hna, tiah theih a si. (CNBC)

Latest News

News in Burmese