, /

Nihin Myanmar: Nihin ah a Cangmi Thawngpang Pical Pawl

The Chin Journal | Hakha | Chin State
  • Mandalay Lamzawhtu Minung 2 Palik Meithal Kahnak in Nunnak Liam
  • Myanmar ah Datsi/Diesel Thla 2 Ca Lawng Taang
  • Japan Sipuazi Rianttuantu Hna nih Myanmar an Chuahtak
  • NCA Minthu Tlangcungmi Hriamtlai Bu 10 nih Ralkap he Biaruah Ngol
  • US, Japan, India le Australia nih Myanmar Democracy Kong ah Lungtlinnak an Ngei

Mandalay Lamzawhtu Minung 2 Palik Meithal Kahnak in Nunnak Liam

Nihin Mandalay khua ah ralkap uknak duhlonak a langhtertu pawl palik nih meithal in an kah hna caah minung 2 an nunnak a liam, tiah theih a si.

Meithal kahnak a chuahnak hmun hi Maha Aungmay peng chung ah a ummi tilawng dinhnak pawng khuate ah a si.

Tilawng a khaltu pawl CDM an tuah dih caah tilawng a chuak kho ti lo. Cucaah, palik nih tilawng chung kutka an bauh i hramhram in tilawng chuahter an timh hna.

Khuami nih an rak chuah hnawh hna i CDM a tuahmi pawl hnek lo ding in chun lingcing ah umkheng an tum hnawh hna i duhlonak an langhter.

Zanlei sml. 4:00 in 5:00 hrawng ah palik nih meithal in an kah hna caah kum 20 le kum 30 hrawng a simi pa pahnih an nunnak a liam. Hliamhma a pumi minung 20 hrawng zong an um. [VOM]


Myanmar ah Datsi/Diesel Thla 2 Ca Lawng Taang

Ralkap nih uknak a chuh hnu in Myanmar ram ah datsi/diesel a lut ti lo i tu hnu thla 2 ca hrawng lawng a taang tiin thawngpang a chuak, tiah BBC nih a langhter.

MK Datsi/Diesel rianttuannak CEO a simi U Min Aung Khanh nih, “February 1 thawk in ramdang lei in datsi/diesel a rak lut kho ti lo. Ahlan ah cun hi bantuk in ramdang lei in a luh khawh lo tik ah kanmah tein kan lak khawh tawn. Asinain, atu cu lak a har ngai cang,” tiah a chim.



Asinain, ramdang lei datsi/diesel pawl chuah khawh ding in kan i zuam cuahmah lio cu a si ko, tiah a chim chap.

“Atulio sining chim ahcun Myanmar ah datsii/diesel a tlawm ngaingai cang ti khawh a si. Atu zong hi rikhiah phun in a phawt in kan i phaw pah cang,” tiah U Min Aung Khanh nih a chim.

“Atu zong ah datsi/diesel man cu a kai cang ko. Asinain, atu ning tein a kal peng ahcun a man a kai chin thluahmah ko lai,” tiah a chim chap. [BBC]


Japan Sipuazi Rianttuantu Hna nih Myanmar an Chuahtak

Myanmar ah ralkap nih uknak a chuh hnu in ramchung a buai ngai cang caah Japan sipuazi rianttuantu hna le thiamsang pawl cu February 20 thawk in vanlawng in an ram lei ah an kir cang hna, tiah theih a si.

Japan ramchung i rianttuannak company nih Myanmar ram chuahtak chung ding in thawng an thanh hna caah All Nippon Airways in nihin ah kir hram an thawk, tiah Japan thawngzamhnak Mainichi nih a ttial.



NCA Minthu Tlangcungmi Hriamtlai Bu 10 nih Ralkap he Biaruah Ngol

U Thein Sein chan le NLD chan ah Myanmar cozah he remdaihnak kong ah hnatlaknak a ngeimi NCA minsenthu tlangcungmi hriamtlai bu 10 nih uknak a chuttu ralkap he remdaihnak kong ceihmai kan ngol, tiah nihin ah cathanh an chuah.

February 19 ah CNF/A telh in tlangcung hriamtlai bu 10 online in ton biaruahnak an ngei hna i atu bantuk in biachahnak an tuah hi a si.

“Ralkap uknak duhlo in CDM a tuahmi zung rianttuantu vialte kan dirkamh hna. Ralkap uknak dohdalnak ah rammipi he kan dir lai. Tlaih a tongmi ramhruaitu vialte thlah dih hna u. Lamzawhtu pawl ruru hranghrang in tthenhmal hna hlah u,” tiah cathanh an chuahmi ah an telh chih. [BBC]


US, Japan, India le Australia nih Myanmar Democracy Kong ah Lungtlinnak an Ngei

US, Japan, Australia le India nih Myanmar ram Democracy dothlennak kong ah lungtlin biachahnak an ngei, tiah theih a si.

“Myanmar ram Democracy dothlennak ah hnahnawhnak a petu bu pawl fak piin lehrul ding” tiah a cunglei ram 4 nih lungtlinnak an ngei.

President Joe Biden nih US President a ttuan hnu ah US, Japan, Australia le India ramleng vuanci pawl a voi khatnak bik tonnak an ngei i, vawleicung COVID-19 kong, Myanmar ram kong le Indo-Pacific ramri kong pawl ceihmainak an ngei hna.

“Myanmar ram ah Democracy uknak phung khulrang in ser khawh tthan nakding le ralhriam le thazaang hmang in thimnak phichuak thlen an timhmi hi fak piin dohdal ding in timhtuahnak kan ngei,” tiah Japan ramleng vuanci Toshimitsu Motegi nih a chim. [7Days News Journal]

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.