/

Nihin Myanmar: Nihin ah a Cangmi Myanmar Thawngpang Pical Pawl

The Chin Journal | Hakha | Chin State
  • US nih Myanmar Ralbawi Pahnih Dan an Tat Than Hna
  • Ram Thawng Pasarih nih Myanmar Ralkap Fak Piin Mawhchiat
  • Australia Ralbawi le Myanmar Ralbawi Gen. Soe Win Phone an i Chawn

US nih Myanmar Ralbawi Pahnih Dan an Tat Than Hna

US nih Myanmar ralbawi pahnih a simi General Maung Maung Kyaw le Lieutenant General Moe Myint Tun cu sipuazi lei dantatnak a pek tthan hna, tiah theih a si.

Myanmar ralkap nih February 1 ah NLD kut cung in uknak an chuh hnu ah ralkap uknak duhlo lamzawhtu minung 4 thi lak in kah an ton ruang ah US nih a cunglei ralbawi pahnih dantatnak a pek hna hi a si.


Myanmar ralkap nih uknak an chuh hnu ah US nih dan an tatmi Myanmar ralbawi 12 an si cang i, Myanmar ralkap ca ah tangka luhnak a simi company pathum zong dantat chih an si.

Dantat tharmi ralbawi pahnih hi US ramchung ah an ngeihmi thilri/rianttuannak vialte US cozah nih a tlaih dih lai. Cun, US ramchung Company le pumpak sipuazi rianttuantu pawl anmah he rianttuan tti lo ding in kham an si. (Irrawaddy)


Ram Thawng Pasarih nih Myanmar Ralkap Fak Piin Mawhchiat

Vawleicung ram tthawngttha pasarih (G7) fonh in nihin ah Myanmar ralkap cung mawhchiatnak cathanh an chuah, tiah theih a si.

“Dai tein lam a zawhmi hna cung ah ruru hranghrang in tthenhmal tuah hi cohlang awk hrimhrim a ttha lo. Hi kong ah ttuanvo a ngeitu hna ralchanh in lehrulnak a um ve lai. Daw Aung San Suh Kyi le President U Win Myint telh in tlaihmi vialte a rianrannak in thlah hna u,” tiah Joint Statement an chuah.

G7 tiah auhmi ram tthawngttha pasarih bu ah US, UK, Japan, French, Canada, Italy le Germany an i tel i, atutan Joint Statement a chuahtu ah hin EU zong aa tel ve. (Reuters)


Australia Ralbawi le Myanmar Ralbawi Gen. Soe Win Phone an i Chawn

Australia rampi runvennak ah bawibik changtu a simi Vice-Chief David Johnston nih Myanamr ralbawi Vice-Senior General Soe Win cu February 22 ah phone in a chawnh, tiah theih a si.

Kap hnih phone chawnhnak ah General Soe Win nih Myanmar ram ah thimnak tuah tthan an timhnak kong, Democracy phung he i ruang in lamzawhtu pawl an tthenhmal hnanak kong, 2008 phunghrampi he i tlak in Democracy rampi ser ding in timhtuah a sinak kong le lamzawhtu pawl tthenhmal tik ah thazaang hleihluat kan hmang lo timi pawl a chim, tiah Myanmar cozah thawngzamhnak The Global New Light of Myanmar nih a tarlangh.

Australia runvennak Vice-Chief David Johnston nih Daw Aung Sang Suh Kyi le President Win Myint telh in tlaihmi vialte thlah ding in biaruahnak a ngeih pin ah lamzawhtu hna cung ah Myanmar palik le ralkap nih ralhriam hmang in lehrulnak an tuahmi hi cohlan awk a ttha lo, tiah a chim.

Cun, Myanmar ralkap nih an tlaih vemi Australia rammi Professor Sean Turnell thlah ding in Johnston nih Gen. Soe Win cu a chimh fawn.

Professor Sean Turnell cu sipuazi lei NLD ruahnak petu a si i, Myanmar ralkap nih uknak a chuh hnu ah an tlaih vemi a si. (DVB, The Global New Light of Myanmar)

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.