Nihin Myanmar: Nihin ah a Cangmi Myanmar Thawngpang Pical Pawl

| The Chin Journal | Hakha, Chin State
  • UK nih Myanmar Ralbawi 6 Dantatnak a Pek Chap Hna
  • Myanamr Democracy Kilven Ding in US Lower House ah Upadi Ahran Chuahpi
  • 2020 Myanmar Thimnak Result Hrawh a Si Cang, tiah Ralkap UEC nih Chim

UK nih Myanmar Ralbawi 6 Dantatnak a Pek Chap Hna

UK nih uknak chuttu Myanmar ralkap luzik Senior General Min Aung Hlaing telh in ralbawi minung 6 dantatnak a thar in a pek tthan hna, tiah theih a si.

Kan hnu zarh ah khan UK nih Myanmar ralbawi pathum dantatnak a pek cang hna i atutan hi a voi hnihnak a si.

Dantat chapmi Myanmar ralbawi 6 hna cu:

  1. General Min Aung Hlaing (Commander-in-Chief)
  2. Lt Gen Aung Lin Dwe (Secretary of the SAC)
  3. Lt Gen Ye Win Oo (Joint Secretary of the SAC)
  4. General Tin Aung San
  5. General Maung Maung Kyaw
  6. Lt Gen Moe Myint Tun, hna hi an si.

Atutan a voi 2nk UK dantatnak ah hin ralkap sermi State Administration Council (SAC) chungtel pawl abikin an sel hna.

UK ramchung rianttuannak company pawl le Myanmar ramchung i UK company pawl nih Myanmar ralkap tangka hmuhnak a simi rianttuannak pawl he pehtlaihnak chah dih ding a si.

UK’s Department for International Trade nih a cunglei dantatnak rian hi felfai tein a ttuan lai i, Myanmar rammi ca ah direct in hlawknak a petu ding fimcawnnak le tthanchonak lei rian tu cu pehzul in ttuan an si nakhnga an kilkawi lai. [GOV.UK]


Myanamr Democracy Kilven Ding in US Lower House ah Upadi Ahran Chuahpi

Myanmar Democracy kilven ding in US Lower House (House of Representatives) ah February 25 ah upadi ahran an chuahpi, tiah theih a si.

Cu upadi ahran cu Democrat palai David Price telh in palai pathum nih Lower House ah a chuahpi.

“Myanmar ralkap uknak chuhnak nih khuaruahar le thinphang in a kan chiah. Uknak an lak ruang ah Myanmar ram democracy dothlennak a hnorsuan. Cucaah, Myanmar rammi hna nih an halmi mipi cozah kut cung nawlngeihnak phakter tthan a si nakhnga US Congress nih a rianrannak in kan i zuam lai. Cun, US hawikom ram pawl he i bawm in Myanmar ralkap thiltuahmi cung ah fak piin duhlonak kan langhter lai,” tiah David Price nih a chim.

US Lower House ah an chuahpimi upadi ahran cu “Protect Democracy in Burma Act 2021” (Kawlram Democracy Kilvennak Upadi) tiah a ti a si.

Cu upadi ning cun “Myanmar ralkap uknak chuh kong ah duhlonak fak piin langhter, Myanmar ralkap tlaihmi minung vialte thlah dihter le Myanmar mipi nih thimmi cozah kut cung ah rampi nawlngeihnak apter tthan ding” timi pawl hi US nih Asia vawleitthen chung ram pawl he i bawm in biapi in a ttuan lai. [VOA]


2020 Myanmar Thimnak Result Hrawh a Si Cang, tiah Ralkap UEC nih Chim

NLD nih tlangcimh-mimcimh in a teinak 2020 Myanmar ram thimnak result cu hrawh a si cang i phungning a si ti lo, tiah ralkap sermi Union Election Commission (UEC) Chairman U Thein Soe nih nihin ah a chim.

Nihin ah ralkap UEC nih Myanmar ramchung ramkhel party 53 he biaruahnak a ngei i, cu lio ah cun U Thein Soe nih a cunglei bang in a chim hi a si.

Tonnak ah aa tel vemi Myanmar National Congress party Chairman U Kaung Myint nih, “Myanmar ralkap nih Uknak, Upadi sernak le Biaceihnak tungtlang pathum a tlaih dih cang. Cucaah, ahlan thimnak result le ahlan hluttaw cu hrawh an si tiah fek tein ka chim ngam,” tiah a chim ve.

NLD CEC nih nihin zanlei ah cathanh pakhat a chuah colh ve. Cu cathanh ahcun, “Phungning loin sermi ralkap UEC nih an ceihmi le an chimmi vialte cu phungning lo lawngte an si. Rammi nih biapi ah chia hlah u,” tiah an langhter.

Nihin ralkap UEC nih a auhmi ramkhel party tonnak ah Chin miphun ramkhel party chung in Zo National Region Development Party (ZNRD) lawng a kai.

Tonnak ah aa telmi party hna lak ah USDP dahtilo a dang party vialte hi 2020 thimnak ah tthudan pakhat hmanh a hmu lomi party lawngte an si. [Irrawaddy, Myanmar Now]

Latest News

News in Burmese