Nihin Myanmar Lamzawhnak ah Minung 3 Nunnak Liam

| The Chin Journal | Hakha, Chin State

Nihin Myanmar ramchung ralkap uknak duhlo lamzawhnak ah khuapi tampi ah ralkap le palik nih meithal in an kah hna caah a nunnak a liammi minung 3 an um, tiah theih a si.

Irrawaddy ramtthen, Phyapung khua i ralkap uknak duhlo lamzawhnak ah palik nih meithal kuan taktak in an kah hna caah minung pakhat a nunnak a liam i a dang minung 6 hliamhma an pu hna.

Nihin chun Phyapung khua ah palik nih an tlaihmi pawl thlah ding in khuami hna nih palik sakhaan hmai ah an kal hnawh hna i, cu lio ah cun palik nih meithal kuan taktak in an kah hna caah kum 30 a simi U Thiha Soe a nunnak a liam hi a si.

Phyapung khua i hliamhma a pumi minung 6 lak ah hin minung 2 hi an hliamhma a fak ngaingai.

Kachin ramkulh, Myitkyina khua lamzawhnak ah ralkap nih meithal in an kah hna caah pa pahnih an nunnak a liam.

Myitgyina khua, Aung Nan Catholic Church pawng i lamzawhtu pawl cu ralkap nih an kah hna caah kum 63 a simi U Cho Tha le kum 23 a simi Ko Zin Min Htet an nunnak a liam.

Minung pahnih an nunnak a liam pin ah a dang minung 5 hliam fak an tuar i, a tlawm bik minung 10 zong tlaih an tong.

Nihin Myanmar ramchung lamzawhnak hmun kip ah ralkap le palik nih mitthli bomb, rubber kuan le kuan taktak pawl in ruru hranghrang in mibu an tthen hna.

Mandalay khua ah cun ralkap motor nih lamzawhtu pawl a pah hna i, motor in pah a tong i a tlurilmi pawl cu ralkap nih tanbo in an tuk chih hna. Mandalay ah hin ralkap motor pah ruang ah minung 5 an i hliam.

Cun, Pathein, Dawei, Lashio, Hintadah, Mawlamaing, Bamaw, Naypyidaw le Lattpada tibantuk khua pawl zong ah ralkap le palik nih lamzawhtu pawl ruru hranghrang in an tthenhmal hna, an tukvelhnak ruang ah hliamhma a pumi an tampi.

Nihin cu “Vawleicung Nu Hna Ni” (International Women Day) a si bantuk in Myanmar ramchung lamzawhnak kip ah nu hna nih an hni thantar ah hmang in ralkap uknak duhlonak an langhter hna.

Myanmar ralkap nih uknak an chuh ni Feb. 1 hnu in atu tiang ah minung 60 leng an nunnak a liam cang, tiah lamzawhnak ah a nunnak a liammi hna cazin a latu Heroes of Myanmar website nih a langhter.

Cherhchan: Myanmar Now, RFA, BBC

Latest News

News in Burmese