Nihin Kawlram ah Meithal Hliampu Pahnih an Um Than

| The Chin Journal | Hakha, Chin State

Nihin Kawlram chung lamzawhnak ah palik nih meithal in an kah tthan hna caah siangngakchia pahnih hliamhma an pu, tiah theih a si.

Mon ramkulh, Mawlamaing khuachung lamzawhnak ah palik nih mibu tthennak ah meithal in an kah hna.

Lamzawhnak ah aa telmi U Kyaw Kyaw Win nih, “Pa mino pahnih kah an tonmi ka hmuh. Cun, ka pawng ah nu pakhat kuan nih a zeau i a takvun a kok. An tlaihmi mino pawl kan thlah tthan ko hna lai an ti hnu ah palik nih mibu lei ah an rak kah,” tiah a chim.

Siangngakchia 4 zong tlaih an tong i khuami nih palik zung ah an kal hnawh hna i thlah ding in an hal hna hnu ah nihin zanlei ah an thlah tthan hna.

Lamzawhnak ah aa telmi U Kyaw Kyaw Win nih, “An luan tuk cang. Nizan zong ah lamzawhtu mino an kah hna. Atu zong an kah chap hna. Ralkap uknak tang kan umnak ni tlawmpal lawng a rau rih nain mipi fak tuk in a kan namneh colh. Ralkap uknak a fih in ka fih,” tiah Irrawaddy sthawngzamhnak ah a chim.

Palik nih an kah hnanak kuanfang hi meithal kuan taktak si loin khaihriat kuan (Rubber Bullet) a si i, siangngakchia pahnih cu hliamhma fak ngai an pu nain thihnak tiang in a chuahpi dingmi hliamhma an si lo.

Naypyidaw ah palik bawi pakhat nih meithal kuanfang taktak in nizan nai ah kahmi University siangngakchia nu Ma Thwe Thwe Khaing (kum 19) tu cu a thluak a thih cang caah “A thi tiah ti awk a si ko cang. Oxygen kan pekmi tu hi chungkhar hnatlaknak in phoih lawng a taang,” tiah sibawite nih an chim.

Cherhchan: BBC, Irrawaddy

Latest News

News in Burmese