Nihin ah India in COVID-19 Sii 1,500,000 Myanmar ah Phan Lai

| The Chin Journal | Hakha, Chin State

Nihin ah COVID-19 runvennak sii “COVISHIELD” 1,500,000 cu India ram in Myanmar ram ah a voi khatnak bik a phan lai, tiah Daw Aung San Suh Kyi nih a chim.

“Thawngpang tha kan tanh hna. Thaizing January 22 ah a voikhatnak Covid-19 runvennak sii cu kan ram ah a phan cang lai. India in a phan lai,” tiah Suh Kyi Myanmar rampi zapi sin ah thawng a thanh.

“A phan dingmi sii hi 1,500,000 lawng a si caah minung 750,000 hman lawng a si. A hmasa bik le papek in ngandamnak lei riantuantu le volunteer pawl ca ah a si lai. Apahnih nak ah a cozah lei rian ngan deuh a tlai mi ca ah a si lai,” tiah a chim chap.

Cun, amah Suh Kyi pumpak zong hawihlan ah ah sii aa chun ding a si ve caah rammi nih phundang in an ruah lo nakhnga nawlnak zong a tuah.

“Mipi nih phundang in nan ka ruah lo nakding ah nawl kan duh hna. Aruang cu mah si chunh ding ah hin keimah zong ka tel ve lai. Hluttaw palai pawl zong a rauh hlan ah Hluttaw meeting tuah si cang lai caah sii pek ve an si lai,” tiah a chim.

Nihin Myanma rah a phan dingmi COVID-19 runvennak sii hi Oxford University le AstraZeneca nih an sermi “COVISHIELD” a si i, India ram i vawleicung a ngan bikmi sii serchuahnak Serum Institute of India ah an serchuah cuahmah.

Myanmar cozah nih “COVISHIELD” dur 3,000,0000 a cah. Atutan hi a voi khatnak bik acheuchum an phakter a si lai.

Myanmar cozah nih a cahmi COVISHIELD azapi man ah $150 million a dih ding a si i, sii man acheuchum $75 million hi Myanmar cozah nih a pek hmasa lai.

Myanmar ram ngandamnak zung ah Deputy Director General a simi U Myat Wunna Soe nih, “Ruvennak sii a rak phak lecangka in ahmasa bik in ngandamnak lei rianttuantu pawl hi pek hmasa an si lai. Cun, kum 60 cung upa le ngakchia pek an si lai. Cu dih cun, khuate lei i COVID-19 zawtnak a tamnak hmun le naupawi lio nu an tamnak hmun ah pek an si ve lai,” tiah a rak chim.

2021 chung ah hin Myanmar ramchung milu 40% sin ah COVID-19 runvennak sii phakter ding in timhtuah a si i, 2022 le 2023 chung ah a taangmi 60% sin ah phakter chap ding in timhtuahnak kan ngei, tiah Ministry of Health and Sports ah ruahnak petu Professor Dr Saw Win nih nih a chim.

Tuluk ramleng vuanci Wang Yi zong January 12 ah Myanmar ram ah a rak phan i, Daw Aung San Suh Kyi he tonnak an ngei lio ah Myanmar ram sin ah COVID-19 sii dur 300,000 bawmh ding in bia a kamh, tiah theih a si.

Latest News

News in Burmese