Ni 117 Chung a Thluak Thimi Nu Nih Fanute Tlamtling in a Hrin

| The Chin Journal | Hakha, Chin State

Czech Republic ram, Brno khua ah kum 27 a simi hringtu nu nih ni 117 chung thluak thih in a um hnu ah fanute tlamtling in an hrin khawh, tiah theih a si.

Hi hriangtu nu hi tukum April thla ah khan thihri dawh in zualhma ngaiin a um i Helicopter in Brno University sizung ah an phakpi hnu ah a thluak a thi.

Phundang in chim ahcun sii lei thiamnak in a nunnak sauhter (Life Support) lo ahcun a thi ding a si cang.

A thluak a thih lecangka in sibawite nih hringtu nu pumchung ah a ummi thla 4 nausemte khamh awk ah biatak tein an i zuam.

A thluak a thi cangmi kum 27 hringtu nu i a takpum cu Artificial Life Support hmang in an nunter peng. A pumchung i naute a than khawh nakhnga hringtu nu i a kee cawlcanghnak zong seh in an tuahpiak peng.

August 15 a hun phak tikah mizapi an khuaruah a har. A thluak a thimi hringtu nu nih 2.13kg a simi fanute tlamtling tein a hrin khawh.

Nuate a hrin khawh dih in a thluak a thimi hringtu nu i Artificial Life Support cu an phonghpiak i a nunnak a liam thai. Nung ding a si ti lo caah atu bantuk hin an tuah hi a si.

Dr. Pavel Ventruba nih, “Hi bantuk thilcang hi ahlan ah kan tong bal lo. Mithi nu chungkhar hna hnatlaknak loin le anmah bawmhnak loin hi thil hi kan tuah khawh ding a si lo. Atu bantuk in naute muihmai kan hmuh khawh tik ah kan lung a lawm tuk ve,” tiah Reuters thawngzamhnak sin ah a chim.

Latest News