New Zealand ah Muslim Biakinn Pahnih Meithal in an Kah, Minung Tam Taktak an Thi

| The Chin Journal | Hakha, Chin State

New Zealand ram, Christchurch khua ah Muslim Biakinn ‘Mosque’ pahnih cu hriam aa tlaihmi phu pakhat nih March 15 ah meithal in an rak kah hna. Minung tam taktak an thi New Zealand palik nih an chim.

A thimi cazin fiang in hngalh a si rih lo. Meithal kaptu minung 4 tlaih an si cang i pa 3 le nu 1 an si tiah palik bawi Mike Bush nih a chim.

Kahdohnak a tuahtu chung in a luatmi um dawh an si ti lo tiah Mike Bush nih cun press conference ah a chim.

Hi kahdohnak hi ralhriam tling hirhiar te le a hlankan timhlamhnak rak ngeih bu tein an tuahmi a si lai tiah ruahdamh a si.

“Hihi cu tih a nung ngaimi kahdohnak phunkhat a si” tiah Mike Bush nih a chim.

Mosque Biakinn lenglei ah thi le hnai he aa ciahmi minung le mi tampi an zaam cuahmah lio mithmuh tette minung nih New Zealand hrambunh media sin ah an chim.

Thil sining dikthlir hngalh a si rih lo nain “Atu caan i kan chim kawhmi cu, nihin hi New Zealand tuanbia ah chuaci a muih bik nicaan a hun si” tiah New Zealand Prime Minister ‘Jacinda Ardern’ nih cathanh a chuah.

-BBC; CNN

Latest News