Myo Gyi COVID-19 a Ngeih Hnu in a Umnak Pearl Condo Zong Lockdown an Tuah

| The Chin Journal | Hakha, Chin State

Myanmar ram minthang hlasabu Iron Cross (IC) ah chungtel a simi Myo Gyi cu COVID-19 zawtnak a ngeih ca ah a chungkhar he an umnak Pearl Condo zong Lockdown an tuah cang, tiah Pyituh Hluttaw palai U Tun Myint nih a chim.

“Atunai khan ngandamnak lei nih a run kan pehtlaih. Myo Gyi COVID-19 a ngei timi ahmaan ko,” tiah a chim.

Yangon ramtthen hluttaw palai U Taung Htuat nih, “Myo Gyi COVID-19 zawtnak a ngei tiah an hmuh. A umnak Pearl Condo zong Lockdown an chiah cang i, amah he naihniam in aa pehtlaimi pawl cazin lak hram an thawk cang,” tiah a chim.

Tuzan sml. 8:00 hrawng ah COVID-19 zawtnak a ngeimi minung 11 an fehternak kong Myanmar ram ngandamnak zung nih thawng a thanh.

Hi minung 11 hi Myo Gyi te he Facebook ah Live thlah ding in aa pummi lawngte an si.

Yangon khua i 8 Mile ah a ummi biakinn ah March thla thih lei thawk ah khan Myo Gyi te nih Dream Ministry timi Facebook Page hmang in Pathian thangthatnak Live an thlah tawn.

Anmah sin ah aa pum i, Keyboard a tummi tlangval pate cu COVID-19 a ngei (Case 34) tiah fehter a si hnu ah a dang aa pummi pawl zong zawtnak an i chonh dihmi an hmuh hna.

Tuzan sml. 12:30 ah khan Myanmar ram ngandamnak zung nih COVID-19 zawtnak a ngeimi cazin an chuah tthan i nihin ni khat chung lawnglawng ah minung (21) sin in COVID-19 zawtnak an hmuh hna.

Hi minung (21) chung ah hin Myo Gyi le a nupi an i tel pin ah kum (7) ngakchia pakhat zong aa tel ve.

Atu tiang ah Myanmar ram ah COVID-19 a ngeimi minung 62 hmuh an si cang i minung 4 an nunnak a liam. Minung 2 nih damnak an hmu tthan.

Ref: The Voice, Irrawaddy

Latest News

News in Burmese