Myanmar-Thai Ramri ah Online in Rian a Kawlmi Nu Tampi Sualpi an Tong

| The Chin Journal | Hakha, Chin State

Thailand le Myanmar ramri, Thailand ramchung i Mae Sok district chung ah online hmang in rian a kawlmi nu 50 leng sualpi an tong, tiah theih a si.

Ni khat Thailand tangka Baht 5,000 in 8,500 karlak nan hmu lai tiin online ah fakthanh an tuahmi a zumtu nu pawl cu rian kan in pek lai a titu pawl nih datsi dawr tibantuk ah tonnak ngeih ding in an auh hna.

Ramdang khual a dongtu, Fashion riantuan ding tibantuk rian pawl pek nan si lai tiah an ti hna i nutung no cheukhat zong rian hmuh awkah online cun an sok cio.

Asinain, rian a petu ding pa pawl he an i ton tik ah motor asiloah motorcycle in ramlak le Hotel ah an kalpi hna i an sualpi tawn hna. Acheu cu nupa thisa thawhnak siitlang an eiter hna.

Hi thawngpang a hlathlaitu Mae Sok hrambunh Thai thawngzamhnak AEC News nih, “Nutung no pakhat cu zunput ah aa kalter i a zaam kho. A vapa phone a chawnh hnu ah a vapa nih a run don i cuticun a luat” tiah a langhter.

Online rian kawlnak in hlenthawi le sualpi a tongmi nu 50 leng nih palik sakhaan ah report an tuah nain palik nih record chung lawng ah an khumh theo i sualnak a tuahtu pawl tlaih khawh an si lo, tiah AEC News nih a langhter chap.

Latest News