Donald Trump nih Myanmar Telh in Ram 13 Immigrant Visa a Phihmi Order Joe Biden nih a Let

| The Chin Journal | Hakha, Chin State

US President Joe Biden nih nihin ah Executive Order 15 cung ah minsen a thut i cu chung ah cun Donald Trump nih Myanmar telh in vawleicung ram 13 Immigrant Visa a rak phihmi order cu Joe Biden nih a hrawh tthan.

Aluancia January 2017 thawk khan Donald Trump cozah nih Iran, Libya, North Korea, Somalia, Syria, Venezuela le Yemen cu US ram ah luh lo ding in visa a phih hna.

Cun, January 31, 2020 ah Myanmar, Eritrea, Kyrgyzstan, Nigeria, Tanzania le Sudan ram hna zong Donald Trump cozah nih Immigrant Visa phihmi ram ah a telh chap hna (Proclamation 9983 of January 31, 2020).

Donald Trump cozah nih visa a phihmi ram hna lak ah Myanmar, Eritrea, Kyrgyzstan le Nigeria ram pawl hi US ah pem khawhnak Immigrant Visa pek lo ding in kham an si. Asinain, caan karlak US ah tlawnkai khawhnak visa tu cu onh an si.

Department of Homeland Security (DHS) Secretary nih, “Visa phih tharmi ram 6 hi US he pehtlaihnak ttha a ngeimi ram an si ko. US he ttha tein pehtlai in rianttuan a duhmi ram zong an si ko. Asinain, Visa Ban kong ah ri kan chiahmi an tlinh lo. Ram 200 ttha tein kan zohfel hna hnu ah a tang bik ah aa thlaimi ram an si hna,” tiah a rak chim.

Donald Trump cozah nih kutka a kharkhenhmi ram tam u hi Muslim ram an si hna i, atu US President thar Joe Biden nih Donald Trump order a hun hrawh tik ah vawleicung Muslim ram tampi nih Joe Biden an hun thangtthat ngaingai ve.

President Joe Biden nih nihin i Executive Orders min a thutmi lak ah vawleicungpi ca ah abiapi bikmi hna cu: Vawleicung khuati runvennak ah i teltum tthan ding (Paris Climate Agreement), World Health Organization (WHO) ah US i teltum tthan ding le Immigration kong hi an si hna.

Ralzam lak kong he pehtlai in Donald Trump cozah nih kum khat ah ralzam 15,000 lawng lak ding tiang in a rak tthumh.

Asinain, Joe Biden nih cun US President a rak si hlante khan kum khat ralzam 125,000 la kho ding in kan i zuam lai, tiah a rak chim.

Hika LINK hi hmet law Joe Biden nih Donald Trump’s Visa Ban Order a Hrawhnak White House chuahmi Official Cathanh hi Mirangca in rel ve.

Cherhchan: The New York Time, Fox News

Advertisement

Thawngpang Thar