Myanmar Rampi Nawlngeihnak Ralkap Bawizik Kut ah an Pek

| The Chin Journal | Hakha, Chin State

Myanmar rampi uknak cu nihin zinglei sml. 8:00 thawk in Myanmar ralkap bawizik Senior General Min Aung Hlaing kut ah chanh a si cang, tiah ralkap thawngzamhnak MWD nih thawng a thanh.

“November 2020 thimnak ah vote ningcang loin thlaknak tam tuk a um bu ah acozah lei nih a kan chimphoihpiak duh lo. Amyotha Hluttaw le Pyituh Hluttaw tthut caan hnu deuh ah thawn ding in kan halmi zong a kan zul duh lo. Cucaah uknak kan lak,” tiah ralkap nih thawng an thanh.

Phunghrampi pohma 418 ning in Emergency Situation ah kan phan tiah ralkap nih thawng an thanh chap.

“Phunghrampi pohma 417 ning in Myanmar ram cu Emergency Situation ah kan thanh i, phunghrampi pohma 418 (a) ning in Myanmar ram uknak nawl, biaceihnak nawl le upadi sernak nawl vialte cu Myanmar ralkap bawizik kut cung ah ap dih a si cang,” tiah an langhter chap.

Atu bantuk in ralkap nih thawng an thanh cang tik ah phungning in rampi uknak an lak cang tinak a si i, Hluttaw zong ngol a si cang tinak a si.

Myanmar rampi President U Win Myint zong Daw Aung San Suh Kyi he an tlaih chih caah Vice President (1) a simi U Myint Swe (USDP, Ralbawi tthing) cu caan karlak rampi President rian an khinh.

Latest News

News in Burmese