Myanmar Rammi COVID-19 Vennak Sichunh kong NUG nih a Tawlrel Cuahmah

| The Chin Journal | Hakha, Chin State

Myanmar rammi pawl COVID-19 runvennak sii an i chunh khawh nakhnga NUG nih a tawlrel cuahmah, tiah NUG ngandamnak lei vuanci Dr. Zaw Wai Soe nih Myanmar Now ah a chim.

Myanmar ramchung ah zeitindah sii luhpi a si lai i, sichunhnak kong ah zei bu nih dah ttuanvo an lak lai timi kong an ceihmai liopi a si.

“Myanmar ram ah sii rak luhpi i SAC zong nih chunh, kanmah NUG zong nih chunh ve. Asinain, NUG le SAC karlak tlangtlatu ah vawleicung bu pakhatkhat (Third Party) nih ttuanvo lak. Cuti a si khawh lo hmanh ah NUG le SAC zong nih chunh lo in um i, ramleng bu pakhatkhat tu nih ttuanvo lak i sichunhnak tuah ding in ruahnak cu a um,” tiah Dr. Zaw Wai Soe nih a chim.

“Ramri in sii rak luhpi i sichunhnak tuah ding phun zong in ceihmai a si. Asinain, Mingaladon Airport phak tik ah SAC he biaruah a hau lai. SAC he biaruah ti tik ah SAC hi kan theihpi tinak si loin ramchung ah sii a phak khawhnak lam kan kawl bia tu a si,” tiah a chim chap.

A voi 3nk COVID-19 pulraipi control khawh a si lo ahcun Myanmar ram hi a loralmi ram (Failed State) ah aa chuah lai.

Cuti thil a can lo nakhnga ngandamnak lei R2P (R2P for Health) bantuk in ramdang bu (Third Party) nih a kan tlangtlak nakhnga NUG nih kan i zuam hi a si, tiah a chim.

NUG nih ramdang bu pawl an pehtlaihmi an um cang nain SAC nih hnahnawhnak an pek sual hna lai timi phan ruang ah an min pawl langhter a si rih lo.

NLD cozah chan ah Myanmar ram mipi hlutmi tangka le ramleng lei bawmhnak in COVID-19 runvennak sii cawk chap ding in timhtuah a si nain SAC nih uknak an ramh ruang ah a tlamtling kho ti lo.

COVID-19 a voi 3nk a hun chuah in Myanmar hmun kip ah zawtnak a karh i mithi zong nitin in an karh.

Yangon ramtthen chung lawng ah nikhat ah mithi ruak 600 in 1000 karlak thlanhmun ah an phan hna.

“SAC nih COVID-19 zawtnak control kho ding in thilti khawhnak a ngeih lo caah hiti ning hin cun Myanmar ah tuksum thihlohnak fak an tong lai,” tiah UN palai Thomas Andrew zong nih ralrin peknak bia a chim.

Atulio ah cun NUG tawlrelnak in Myanmar ramchun sibawi 900 hrawng nih COVID-19 zawtnak a ngeimi pawl cu phone le internet hmang in a lang in thlopbul ningcang an chimh hna.

Advertisement

Thawngpang Thar