Myanmar Ralzam 1,200 Kuat Than Lo Ding UNHRC nih a Fial

| The Chin Journal | Hakha, Chin State

Malaysia ram um Myanmar ralzam 1,200 cu Malaysia cozah nih Myanmar ram ah kuat ding in timhtuahnak a ngei nain Myanmar ram ah ralkap nih uknak a lak ruang ah UNHRC nih kuat tthan lo ding in a thloh, tiah theih a si.

Myanmar ralkap nih uknak an lak hnu ah Myanmar ralzam pawl lak nakding ah ralkap tilawng pathum Malaysia lei ah kan rak thlah lai tiah Myanmar ralkap le Malaysia cozah biaruahnak an ngei i, Malaysia cozah a lung a tling.

“Hremnak le nuhrin covo buarnak an ton nakding ram ah ralzam pawl kuat tthan lo ding (The Principle of Non-refoulement) timi International Human Rights upadi hi Malaysia ram zong a huap. Cucaah, Myanmar ralzam pawl hi ralkap uknak tang ah Malaysia nih a kuat tthan hna awk a si lo,” tiah Kuala Lumpur i UNHRC chimnak nawlngei Yante Ismail nih a chim.

Malaysia Immigration Director-General Khairul Dzaimee Daud nih Myanmar rammi 1,200 an ram lei ah kan kuat tthan hna lai tiah February 11 ah khan a chim caah UNHRC nih a hun thlolh colh hi a si.

Malaysia ramchung nuhrin covo kong a cawlcangtu zatlang bu pawl zong nih Myanmar ralzam pawl hi ralkap uknak tang ah kan khirh tthan hna a si ahcun an ca ah ttihnung a si, tiah lungretheihnak an langhter ve.

Malaysia cozah nih Myanmar rammi 1,200 a kuat taktak hna lai le kuat taktak hna lai lo hi fiang in theih a si rih lo.

Malaysia cozah nih ramdangmi tlaihkhihmi pawl an chiah hnanak (Detention Centers) pawl ah August 2019 thawk in UNHRC luhnak nawl a pek ti lo caah UNHRC nih ahote dah refugee ngaingai an si timi hliah awk ah aa harh ngai cang.

Cun, atutan Myanmar rammi 1,200 an ram lei kuat tthan ding in Malaysia cozah nih timhtuahnak a ngeihmi kong hi UNHRC ah Malaysia cozah nih phungning in thawngthanhnak a tuah rih lo.

Malaysia nih Myanmar rammi kuat tthan a timhmi minung 1,200 lak ah International Protection tuahpiak a haumi nu le ngakchia tampi zong an um kho, tiah UNHRC nih a chim.

Cherhchan: Reuters, Free Malaysia Today

Advertisement

Thawngpang Thar