, /

Myanmar Ralkap nih US, EU Chungtel Ram Hna Cathanh Lehnak Tuah

The Chin Journal | Hakha | Chin State

Myanmar ralkap nih US le EU chungtel ram hna nih cathanh an chuahmi lehnak cathanh nihin (Jan. 31) zan ah a chuah ve, tiah theih a si.

January 29 ah khan US, Canada le Australia telh in EU chungtel ram 13 nih Myanmar ralkap ralrin peknak cathanh an rak chuah.

Cu an cathanh ah cun, “Thimnak phichuak thlennawn ding in cawlcanghnak vialte le Myanmar ram Democracy thlennak hrawhral ding in i zuamnak vialte cu kan doh,” tiah an langhter.



A cunglei cathanh kong he pehtlai in Myanmar ralkap nih, “Thil sining fiang ngaingai an theih lo buin cathanh an chuah timi a fiang ko,” tiah an langhter.

“2020 thimnak ah vote 10.5 million hrawng hi ningcang loin thlakmi vote an si tiah kan hmuh i cucu cohlan awk a ttha lomi a si. Cu bantuk vote ningcang lo thlaknak cu cathanh a chuahtu ram pawl nih teh nan cohlang kho lai maw?” tiah ralkap cathanh ah an tthial chap.

“Cucaah, ralkap nih forhfial kan duhmi hna cu cathanh an chuahmi kong ah an ruah tthan a herh timi le zei ruang ah dah ralkap nih thimnak result check tthannak kan tuah timi hi ttha tein an theihfian a herh ve,” tiah an langhter.



“Cun, Myanmar ram Democracy dothlennak rian Myanmar ralkap nih an khul an fumter tiah an kan timi hi kan cohlang hrimhrim lo. Myanmar ram Democracy lamthluan cung ah kar a hlan khawh nakhnga Myanmar ralkap nih 2008 phunghrampi kan ser i, lam zong kan sialpiak,” tiah cathanh ah an ttial.

Myanmar ralkap hruainak in November 2020 thimnak phichuak thlennawn ding in an i zuammi kong ah US le EU chungtel ram hna lawng si loin UN zong nih ralrin peknak cathanh January 29 ah a chuah ve.

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.