Myanmar Nu (6) Tuluk ah a Zuartu Kum (80) Thong Dantatnak an Pek

| The Chin Journal | Hakha, Chin State

Shan ramkulh ah a ummi nu (6) Tuluk rammi sin ah a zuartu nu cu Tuangkyi District biaceih zung nih kum (80) thongtlak ding in dantatnak a pek, tiah theih a si.

2018 ah khan Shan ramkulh, Phekhung peng ah a ummi Ma Htay Lay, A Kyi Kaung, Ma Thida le Mah Nan Ngyunt timi minung pali nih Phekhung ah a ummi nu panga le Sisaing khua ah a ummi kungtlinglo nu ngakchia pakhat cu Tuluk ram ah an rak zuar hna.

Tuluk-Myanmar ramri, Tuluk ramchung, Sweli khuachung i rawldawr, shopping mall, thilthitnak sehzung pawl ah rian nan hmu lai tiah an hlen hna i Tuluk pa pawl sin tu ah an zuar hna.

Minung zuartu pali cu pohma no. 28 in taza an cuai hna i an hruaitu bik a simi Ma Htay Lay cu Taungkyi district biaceih zung nih kum (80) thong dantatnak a pek i a dang a hawile pawl zong kum (20) cio thongthlak ding in dantat an si.

Nu (6) Tuluk pa pawl sin zuar kong ah pehtlaihnak a ngeimi Myanmar rammi pawl an um rih i tlaih ding in an kawl lengmang hna nain Tuluk ram ah an zaam ca ah atu tiang an tlai kho rih hna lo, palik bawi Lin Naing nih a chim.

-7Day Daily

Latest News