Myanmar Khulrang in Bawmh awkah UN Palai nih a Hal

| The Chin Journal | Hakha, Chin State

Ramkhel buaibainak lak ah COVID-19 zawtnak fak tuk in a tuarmi Myanmar ram hi vawleicung ram kip nih arianrannak in kan zuan hnawh a herh, tiah Myanmar ramchung nuhrin covo kong ah UN palai a simi Thomas Andrew nih halnak le forhfialnak a tuah.

Myanmar ram ah tuksum in COVID-19 zawtnak a karh, ngandamnak zohkhenhnak lei system a tlu flawn, SAC he aa pehtlaimi rianttuannak vialte Myanmar mipi nih an zum ti fawn lo, tiah Thomas Andrew nih a chim.

“Myanmar ram nih khulrang in lakhruak bawmhnak a hmuh colh lo a si ahcun sunghzatlaknak le thihlohnak thlichia pi a tho ko lai,” tiah a chim chap.

Minung pakhat nih a tinco awk a simi ngandamnak lei zohkhenhnak nawl cu Myanmar mipi nih an ramchung ah an tingco kho ti lo. Cucaah, vawleicung ram hna nih kan zuan hnawh a herh, tiah pehzul in a chim.

“Myanmar ramchung COVID-19 zawtnak khenkham awk ah SAC nih thilti khawhnak a ngei lo. Mipi zong nih an zumh hna lo caah atu ning in thil a kal ahcun minung tam tuk an nunnak a liam lai,” tiah a chim.

Cucaah, SAC le ramkhel party pawl he pehtlaihnak a ngei lomi COVID-19 runvennak sii chunhnak program Myanmar ram ah tuah khawh a si nakhnga tawlrel colh a hau, tiah a chim chap.

Atulio ah Myanmar cu Asian chung ah COVID-19 zawtnak a karhtertu bik ram pakhat ah aa chuah cang. Cucaah, Myanmar innpa ram hna, NGO hna le vawleicung bu kip i bawm in arianrannak in ttuanhma kan lak zokzok a hau, tiah forhfialnak a tuah.

Advertisement

Thawngpang Thar