Myanmar he aa Pehtlaimi Nihin Thawngpang Pical Pawl

| The Chin Journal | Hakha, Chin State
  • Dr. Sasa: ICC ah Myanmar Ralkap (SAC) Tazacuai Ding in kan Tawlrel Lai
  • UN Rianttuantu Thing Thiamsang Pathum Telhmi Myanmar Kong Ruahnak Petu Bu an Dirh
  • Malaysia nih Hmaisuang in Asia Chung Ram Pawl Myanmar Kong a Ceihpi Hna
  • CRPH nih Caan Karlak Myanmar Vuanci Pawl Riankhinhnak Thawngthanh
  • Lamzawhtu Thennak ah Meithal Kuan Taktak Hman Lo Ding in Cunglei Ralkap nih Thloh

Dr. Sasa: ICC ah Myanmar Ralkap (SAC) Tazacuai Ding in kan Tawlrel Lai

Myanmar ramchung ah tuksum nuhrin covo buarnak le lamzawhtu pawl thahnawnnak ah ttuanvo ngeitu bik a simi State Administrative Council (SAC) cu Vawleicung Biaceih Zungpi (International Criminal Court-ICC) ah tazacuai ding in kan i zuam lai, tiah Dr. Sasa nih a chim.

Dr. Sasa nih, “CRPH nih a chuahmi official cathluan pawl kha vawleicung upadi lei thiamsang pawl hmang in ICC ah kan phakter lai. SAC nih Myanmar rammi hna cung ah a tuahmi hranhramnak (Violence) vialte a zizut dih a si lai. Thisen a tlami dor khat kip ca ah SAC dantat aa huah a hau,” tiah a chim.


UN Rianttuantu Thing Thiamsang Pathum Telhmi Myanmar Kong Ruahnak Petu Bu an Dirh

UN ah rian a rak ttuan balmi thiamsang minung pathum telhmi Myanmar ram kong ruahnak petu bu (Special Advisory Council of Myanmar-SACM) timi an dirh, tiah theih a si.

Hi SACM ah hin Myanmar nuhrin covo kong ah UN palai a rak ttuan balmi Ms. Yanghee Lee, Rohingya kong thil sining hlathlaitu bu FFM ah Vice-President a rak ttuanmi Mr. Marzuki Darusman le FFM chungtel thotho a simi Mr. Chris Sidoti hna hi an i tel.

Hi SACM bu nih hin Myanmar ramchung nuhrin covo, Democracy le Daihnak kong pawl he pehtlai in rian an ttuan lai.

Myanmar rammi hna cung i nuhrin covo buarnak le thahnawnnak a tuahtu hna nih an tuahmi sualnak kong ah ttuanvo an lak hrimhrim nakhnga SACM nih aa zuam lai. SACM cu Myanmar ramchung nuhrin covo bu le zatlangbu hna he i bawm in rian a ttuan lai.


Malaysia nih Hmaisuang in Asia Chung Ram Pawl Myanmar Kong a Ceihpi Hna

Nihin March 2 ah Myanmar ram buaibainak kong he pethlai in Asian ram 10 i ramleng vuanci pawl tonpumhnak an tuah, tiah theih a si.

Cu tonpumhnak ah cun Malaysia nih, “Myanmar ralkap nih an tlaihmi Daw Aung San Suh Kyi le President Win Myint telh in tlaihmi vialte thlah dih hna u,” tiah fak ngaiin bia a chim.

Cun, Asian Chairman zong Myanmar ram ah luhnak nawl pek ding le Myanmar ramkhel kong ah ttuanvo ngeitu bu kip he tonnak nawl pek ding in Malaysia nih halnak a tuah fawn.

Siangpore, Indonesia telh in a dang ram hna zong nih ralkap nih an tlaihmi vialte thlah dih ding in le Myanmar ram ah arianrannak bik in Democracy uknak a lenter tthan ding halnak an tuah.


CRPH nih Caan Karlak Myanmar Vuanci Pawl Riankhinhnak Thawngthanh

Caan karlak Myanmar ramchung uknak tungtlang ttha tein a kal khawh nakhnga Committee Representing Pyidawngsu Hluttaw (CRPH) nih caankarlak vuanci thar pawl rian a pek hna, tiah theih a si.

Ramleng vuanci ah Daw Zin Ma Aung; Myanmar President zung le Myanmar ramkomh cozah zung vuanci ah U Lwin Ko Latt; Tangka le Ramleng Sipuazi lei vuanci ah U Tin Tun Naing; Fimcawnnak, Ngandamnak le La Wa Ka vuanci ah Dr. Zaw Wai Soe, tiin riankhinh an si.

CRPH nih cozah thar a dirh bia si loin Myanmar ralkap (SAC) nih uknak an chuh hnu ah ramchung uknak tungtlang a hun rawk thluahmah i, caan karlak chung uknak tungtlang ttha tein a kal khawh nakhnga a cunglei vuanci pawl hi rian an khinh chung hna bia a si.


Lamzawhtu Thennak ah Meithal Kuan Taktak Hman Lo Ding in Cunglei Ralkap nih Thloh

Myanmar ramchung lamzawhtu pawl meithal kuan taktak in kah lo ding in Myanmar ralkap (SAC) nih lamzawhtu mipi a tthenhmaltu palik le ralkap pawl an fial hna, tiah theih a si.

March 2 ah MRTV hmang in ralkap nih a cunglei bantuk in thawngthanhnak an tuah hi a si.

Ralkap nih atu bantuk in thawngthanhnak an tuah hi nihin Asian ramleng vuanci pawl tonpumhnak an thawk laite ah khan a si ve.

Myanmar ralkap nih uknak a chuh hnu in February 28 hi Myanmar ram ah ralkap/palik kut in a nunnak a liammi an tam bik ni a si i, vawleicung ram kip le UN zong lungrethei ngai in a um hna.

UN nih cazin a chuah ning ah February 28 ah lamzawhtu minung 18 an nunnak a liam i, 30 leng hliamhma an pu.

Ralkap uknak hnu in Myanmar ram ah a nunnak a liammi a tlawm bik minung 23 an si cang i, tlaih a tongmi zong 1,000 leng an phan cang.

Latest News

News in Burmese