Myanmar ah H1N1 Zawtnak in Ngakchia Pahnih an Nunnak a Liam Chap

| The Chin Journal | Hakha, Chin State

Atulio Myanmar ram hmun cheukhat ah a cangmi vok zawtnak (H1N1) in June 27 ah ngakchia pahnih an nunnak a liam chap, tiah theih a si.

June 27 tiang ah Myanmar ramchung ah H1N1 zawtnak in a nunnak a liammi minung 12 an si cang.

Atutan a nunnak a liammi ngakchia pahnih lak ah pakhat cu Yangon ah a ummi a si i, a dang pakhat hi Ayeyawaddy ramthen, Kyaiklet khua ah a ummi a si. (BBC)

H1N1 Zawtnak Sining le i Kham Ning

H1N1 hi a cang tawnmi tlangrai zawtnak phun he an i langh ning aa khat, tiah siibawite nih an langhter.

Vok in aa thawkmi zawtnak a si ko nain voksa hmin tein chuanmi ei tik ah zawtnak i lak khawh a si hlei lo. Minung le minung karlak i chawnhmi zawtnak tu a si.

A cang tawnmi tlangrai he an i langh ning aa khat pah ko nain H1N1 zawtnak tu cu hrom fah, chungtlik le luakluak tibantuk fahnak pawl aa kawp chih.

H1N1 Zawtnak Muisam-

  • Khuasih
  • Khuhkhuh
  • Thadih, uai hninghnaing in um
  • Chungtlik
  • Taklinh
  • Lufah le taksa fah
  • Hrom fah
  • Hnapchuah hnarpih
  • Lungmih i luakluak ti bantuk hna hi an si.

H1N1 zawtnak a ngeimi nih an khuh an khuh tikah thli lak ah zawtnak rungrul a chuak. Cu zawtnak rungrul aa telmi thli cu i dawp sual ah cun i chawnh khawh a si.

I dawp sual lawng si loin zawtnak rungrul kha hmai ah a taang i mit, hnar, kaa chung ah a luh ahcun i chawnh khawh thotho a si.

Minung takpum chung ah luh loin takvun cung lenglei ah cun H1N1 zawtnak rungrul hi caan sau a nung kho lo.

Zawtnak rungrul a ngeimi kut tlaih, cil i tonghtham sual tikah cu kan tonghthamnak kut cun kan mit hna kan i hnuai ahcun i chawnh khawh a si.

Zawtnak i chawnh sual ahcun innchung ah i erh, na kut i tawl zungzal, khuhkhuh lo le hnaphnit lo ding i zuam, thianghlim tein um, na kut in na kaa le na mit tawngtham tuk hlah, mi an tam tuknak ah a herh lo ah vung kal len hlah (Na chawnh hna lai), thazaang um ding in rawl tha tein ei, i din, cun, atulio cu H1N1 a um lio a si caah lengchuah tikah zawtnak a ngeimi he ngei lomi he hmaihuh i huh ah a tha bik.

Latest News