Myanmar ah COVID-19 Zawtnak an Hmuh Lecangka in Eidin Tirawl Cawk an i Cuh Lulh Cang Hna

| The Chin Journal | Hakha, Chin State

March 23 zaan sml. 11:30 ah Myanmar ram ngandamnak zungpi nih COVID-19 mizaw pahnih kan hmuh hna, tiah thawng a hun thanh lecangka in mipi nih eidin le tirawl cawk an hun i cuh lulh cang hna.

Abikin, Yangon khua i Shopping Mall pawl ah ruah lo piin minung an hun khat tthup manh i eidin tirawl le chungkhar ca a herhaimi thilri pawl an i cawk cia hna, tiah Irrawaddy nih a ttial.

Chin ramkulh, Tedim peng ah nupi tthit ding in a rak tlungmi kum 37 Chin pa le England ram in a rak tlungmi pa sin in COVID-19 zawtnak cu hmuh a si.

Myanmar ram ah a voi khatnak bik COVID-19 an hmuhnak kong fehter a si i, mipi zong a hun thlalau ngaingai.

Atulio vawleicung ram 180 hrawng ah COVID-19 zawtnak a ngeimi minung 370,000 leng an hmuh cang hna.

Cu chung ah cun minung 100,000 hrawng nih damnak an hmu tthan i a dang minung 16,000 leng an nunnak a liam cang.

Tuan deuh ah cun zawtnak aa thawknak Tuluk ram hi a thimi an rak tam bik nain atu ah cun Italy ram hi COVID-19 zawtnak in a thimi a tam bik an hun si cang.

Tuluk ram ah minung 3,270 an nunnak a liam i, Italy ram ah atu tiang ah minung 6,077 an nunnak a liam cang.

Latest News

News in Burmese