Myanmar ah COVID-19 Sii February Thla Chung ah a Phan Lai

| The Chin Journal | Hakha, Chin State

Myanmar cozah nih India ram i Company pakhat sin ah a cahmi COVID-19 sii cu February thla chung ah a phan lai, tiah an ruahdamh.

Oxford University le AstraZeneca nih an serchuahmi COVID-19 runvennak sii “COVISHIELD” cu India ram i vawleicung a ngan bikmi sii serchuahnak Serum Institute of India ah an serchuah cuahmah i, Myanmar cozah nih siidur 30 million a cah ve.

Myanmar cozah nih a cahmi COVISHIELD azapi man ah $150 million a dih ding a si i, January 5 thawk khan Myanmar rammi chung in tangka hlut a duhmi nih hlut khawh a si tiah thawng zong an rak thanh.

Rammi tangka hlut khawh ding in Myanmar cozah nih thawng a thanh hnu nihnihnak ah tangka $3 million leng an hlut manh.

COVISHIELD sii man acheuchum $75 million hi Myanmar cozah nih a pek hmasa lai i, February thla chung ah Myanmar ram ah cu sii cu a rak phan lai.

Myanmar ram ngandamnak zung ah Deputy Director General a simi U Myat Wunna Soe nih, “Ruvennak sii a rak phak lecangka in ahmasa bik in ngandamnak lei rianttuantu pawl hi pek hmasa an si lai. Cun, kum 60 cung upa le ngakchia pek an si lai. Cu dih cun, khuate lei i COVID-19 zawtnak a tamnak hmun le naupawi lio nu an tamnak hmun ah pek an si ve lai,” tiah a chim.

2021 chung ah hin Myanmar ramchung milu 40% sin ah COVID-19 runvennak sii phakter ding in timhtuah a si i, 2022 le 2023 chung ah a taangmi 60% sin ah phakter chap ding in timhtuahnak kan ngei, tiah Ministry of Health and Sports ah ruahnak petu Professor Dr Saw Win nih nih a chim.

Tuluk ramleng vuanci Wang Yi zong January 12 ah Myanmar ram ah a rak phan i, Daw Aung San Suh Kyi he tonnak an ngei lio ah Myanmar ram sin ah COVID-19 sii dur 300,000 bawmh ding in bia a kamh, tiah theih a si.

Atu tiang Myanmar ram ah COVID-19 zawtnak a ngeimi 134,000 leng hmuh an si i cu chung ah cun minung 118,200 nih damnak an hmu. Cun, a dang minung 2,973 hi COVID-19 zawtnak hi an nunnak a liam, tiah Myanmar ram ngandamnak zung nih January 18 ah thawng a thanh.

Cherhchan: Reuter, Myanmar Times, Eleven Media

Latest News

News in Burmese