MP Ni Sui Lian nih Chinram Ca ah Thil Pical a Tuahmi Hna| Interview

| The Chin Journal | Hakha, Chin State

Chin ramkulh, Thantlang peng in Pyituh Hluttaw MP a simi sayama Ni Sui Lian nih kum 3 fai chung ramrian a tlaih caan chung ah Lairam ca ah thil biapi a tuahmi pawl a langhter.

Cu hna chung ah cun abiapi in Hnaring khuapi hmuhnak, Hakha College tuan ah on a si khawhnak, Hakha nih naungeihter cawnnak sii lei sianginn a hmuhnak le Thantlang khua sizungpi ihkhun 50 ah chapnak pawl hi an i tel hna.

December 6 ah, Naypyidaw ah The Chin Journal nih MP Ni Sui Lian biaruahnak kan ngeih i cu lio ah cun a rianttuannak kong pawl a langhter hna hi a si.

Hnaring Khuapi Hmuhnak: “Hnaring hi khuapi a hmuh a si ahcun chaklei le thlanglei a kan pehtlai khotu khuapi a si lai caah Laimi ca ah a tthahnem tuk ding a si. Cucaah, 2016 ah Hluttaw ah ka rak chuahpi i February 2018 ah Vice President Henry Van Thio nih Myo onnak a rak tuah,” tiah MP Ni Sui Lian nih a chim.

Hakha College: “Hakha kan u le kan pale pawl nih College an rak hal i pek a si ko nain U Thein Sein cozah chan ah khan onnak an rak tuah lo. 2016 ah cozah kan kai tikah Hakha College hi rak kan onpiak zokzok hna seh ti ka duh tuk. Cucaah, hihi Hluttaw ah ahmasabik ah ka halmi a si ve. November 8, 2016 ah a kan onpiak colh ve,” tiah a langhter.

Hakha Naungeihter Cawnnak Sii lei Sianginn: “Hakha ah Naungeihter Cawnnak Sii lei Sianginn tuah ding hi U Thein Sein cozah chan ah an rak tlolhmi a si. Khuadang hna ah thawn an timh timi thawngpang ka theih pah tik ah a rianrannak in a vawleihmun ka zohter hna. Atu November 2019 ah cu sianginn cu Hakha ah an on khawh cang i siangngakchia 30 leng zong an kai cang,” tiah a chim chap.

Thantlang Sizung: “Thantlang peng hi milu zong kan karh ngai cang i ihkhun 25 sizung lawng cun a zat ti lo. Cucaah, ihkhun 50 ah kaiter ding in ka chim i pek kan si. Atu ah cun kum 3 chung Budget zong caanhmaan tein a tla i sizung rianttuantu ah minung 85 lak ding in timhtuah zong a si,” tiah a langhter.

Chin miphun ca ah MP Ni Sui Lian nih Hluttaw ah a chuahpimi pawl tampi an um len rih ko nain a cunglei pali hi biapi in kan rak langhtermi an si hna.

Latest News