Mizoram ah Mahte Thahnawnnak a Karh Caah Thiamsang Pawl Lungrethei

| The Chin Journal | Hakha, Chin State

Mizoram chung ah mahte in nunnak i laknak case a hun karh chin thluahmah caah mahle mah i thahnawnnak a khamtu zatlangbu upa hna le thiamsang pawl an lungre a thei ngaingai, tiah East Mojo thawngzamhnak nih a langhter.

Aluancia 2017 thawk in atu tiang ah Mizoram chung ah mahte i thahnawnnak case 100 leng a um.

Cu chung ah cun atu 2019 chung lawnglawng ah hin mahte i thahnawnnak case 39 bak a um.

“Atu kan theih khawhmi mahte i thahnawnnak number nakhin atak ah a tam deuh khomi a si. Kan theih banh khawh lomi mahte i thahnawnnak case pawl he tuak ahcun hi nakhin let 2 in let 4 tiang hmanh a tam deuh kho,” tiah mahle mah nunnak i laknak a dohtu zatlangbu VOLCOMH ah upa pakhat a simi Dr. Samuel Lalzarlawma Sailo nih a chim.

“Mahle mah nunnak i laknak kham nakding ca ah pum pawcawmnak rian thiamnak pawl hi cawnpiak ah an tha bik. Cu lawng si loin Media pawl zong nih mahle mah i thahnak kong an tial tik ah an i ralrin ngaingai a herh i, fimchimhnak zong an tuah awk a si. Mahle mah thah aa timmi pawl zeitidah kan hliah khawh hna lai i kan kham khawh hna lai timi fimchimh cawnpiaknak tuah hi abiapi tuk fawn,” tiah Dr. Samuel nih a chim chap.

October 10 ah khan Aizawl khua ah Mental Health Day timi an tuah i cuka hmun ahcun Mizoram chung ah kum khat hnu kum khat in a karhmi mahle mah nunnak i laknak hi zeitindah khenkhamnak kan tuah lai timi kong fak piin ceihmainak an ngei hna, tiah theih a si.

Latest News