Mizoram ah Kum 10 Hrawng Tuah Ti Lomi “Chin Miphun Ni” an Tuah Than Cang Lai

| The Chin Journal | Hakha, Chin State

Mizoram ah kum 10 hrawng an tuah bal ti lomi ‘Chin Miphun Ni’ cu tu kum ah hlunghlai taktak in tuah than an timh tiah thieh a si.

Feb. 20 ah tuah timhmi Avoi 71nk Chin Miphun Ni cu Chin Pawlpi phu hruainak in Aizawl khualipi ah hlunghlai ngai in an tuah lai. Khuallian sawmmi hna cu; Mizoram Chief Minister Pu Zoramthanga, Sagaing ramthen Chin Affairs Minister hlun Pu No Than Kap le Chin ramkulh Sipin Minister hlun Salai Isaac Khen hna an si tiah Chin Pawlpi phu in Secretary S.Huliana nih a chim.

“Atu bantuk in Chin Miphun Ni kan tuah thanmi hi Mizoram ah Chinmi tampi kan um. Pathian nih an kan pekmi kan Miphun Ni kan tuah khawh lomi hi ngaihchia ngaingai a si. Cucaah Kan Miphun Ni hi tu kum thok in caan hmaan in kan tuah zungzal cang lai” tiah S. Huliana nih a chim.

Chin Miphun ni donnak caah tiin Feb. 19 ah zaanglekcelh zuamnak zong tuah a si lai i Feb. 20 ah Chin Miphun ni hman a si lai. 2009 thok in Mizoram ah hin Chin Miphun Ni tuahnak lei tawlreltu committee an um ti lo ruang ah kum 10 hrawng tuah loin an rak um.

Tutan, Aizawl Chin Miphun Ni ah Kalay University in ‘Falam phungsang tlawm Cultural Dance Group’ zong an ra lai. Cun Myanmar ramchung Chin hlasakthiam JH Thang le Mai Ma Kim zong sawm an si. Cu lawng siloin Mizo hlasakthiam G. Lalsangliana, Baby Z.Tlau, Angaihtei le Ma Biaki zong an sawm hna.

Central Young Mizo Association (CYMA) Chairman Pu Vanlalruata le Shilong khua in Pu Tialkulhthanga zong sawm an si. Feb. 20 ah tuah tawnmi Chin Miphun Ni hi Mizoram ‘State Day’ zong a si.

Khonumthong

Latest News

News in Burmese