Mizo Siangngakchia Nih Chakma Pa Tangka Fir an Puh, Fak Ngaiin an Hrem

| The Chin Journal | Hakha, Chin State

Mizoram, Serchhip District chung ah Chakma miphun taang-7 siangngakchia pa cu a kai ti hawi Mizo siangngakchia pawl nih tangka fir an puh i fak tuk in an hrem ca ah sizung ah an phakpi, tiah theih a si.

Serchhip District, Thenzawl khua ah a ummi Jawahar Navodaya Vidyalaya (JNV) sianginn ah Mizo siangngakchia pakhat i a tangka Rs. 1000 cu September 26 ah khan a tlau.

Mizo siangngakchia pawl an i pum i lunghrinhmi pawl pakhat hnu pakhat in an auh hna i bia an hal hna.

Chakma siangngakchia pa Nolin Bikash Chakma cu an auh ve i amah bak hi a firtu a si lai tiah an lunghrinh.

Cucaah, hrem buin bia an hal. Ka fir lo tiah a ti peng nain fak tuk in siangngakchia pawl nih an hrem chih i sizung tiang a phan. An hremnak hma a fah tuk caah September 29 ah Aizawl sizung ah an kalpi.

Hi kong he pehtlai hin Central Mizoram Chakma Students’ Union nih duhlonak cathanh zong an chuah i, Nolin Bikash Chakma nih biaceihnak hmaan a hmuh nakhnga tuanvo rak kan lakpiak u, tiah Mizoram cozah sin ah le fimcawnnak zung ah nawlnak zong an tuah, tiah thieh a si.

-Northeast Today

Latest News