Mizo Miphun Kilvennak Caah Miphun Dang Thit/Vat Lo Ding in Siangngakchia Pawl Bia an i Kam

| The Chin Journal | Hakha, Chin State

September 2 ah Mizoram sianginn paruk in siangngakchia tampi nih miphun dang kan va/thi lai lo tiah biakamnak an tuah, tiah theih a si.

Atu bantuk in Mizoram siangngakchia pawl a hrihawhtu hna hi Mizo Zirlai Pawl (MZP) siangngakchia bu an si i, 2015 thawk khan atu bantuk in kum tinte an tuah zungzal.

Mizo miphun pawl miphun dang nih an dolh hna lo nakhnga atu bantuk in MZP nih Mizoram siangngakchia pawl thirawnh in an rawnh hna hi a si i, miphun dang vat/thit lo ding ti tik ah Kala pawl lawng an ti hnawh duhmi si loin Bru, Chakma, Bengali le a dang Mizo a si lomi miphun paohpaoh an i tel dih.

MZP President L Ramdinliana Renthlei nih, “Kan miphun le kan nunphung kilkawinak caah a tha bikmi cu kanmah le kanmah i thit/vat hi a si. Mizo cu milu tlawmte kan si i miphun dang nih olzaang tuk in a kan dolh khawh ding kan si. Cucaah, atu bantuk in miphun dang vat/thit lo ding in forhfial hi a herh tuk,” tiah a chim.

Mizo pupa hna nih an rak ngeihmi phunglam ah “Mizo nu nih miphun dang pa a vat a si ahcun cu nu cu miphun sinak in chuah a si pin ah a fale zong Mizo miphun an si ti lo.” Asinain, hihi hlanlio pupa phung menmen a si i, acozah nih a hmanmi upadi a si lo.

Cucaah, 2018 ah khan Young Mizo Association (YMA) nih, “Miphun dang a vami Mizo nu pawl hi Mizo miphun chung in chuah an si naknga upadi kan chuahpiak u,” tiah Mizoram cozah sin ah an rak hal.

-Eastmojo

Latest News