Minung 170 Leng an Thihnak Vanlawng Russia Ser Bomb nih Kheng Sehlaw a Dawh

| The Chin Journal | Hakha, Chin State

Minung 176 an i citmi vanlawng cu January 8 ah Iran ram, Tehran khua i Imam Khomeini International Airport in Ukraine ram lei ah aa thawh tlawmpal ah a tla i aa citmi minung an zapite in an nunnak a liam.

A nunnak a liammi lak ah Iran rammi 82, Canada rammi 63, Sweden rammi 10 le Ukraine rammi 11 an i tel i a dang pawl hi Afghanstan, Germany le England rammi an si hna.

Iran cozah nih, “Vanlawng seh lei rawhralnak ruang ah atu bantuk in a tlak hi a si,” tiah an chim nain vanlawng a tlaknak i a rawkmi thilri pawl hmanthlak an tarmi lak ah Russia ser Tor Missile kuanhawng bantuk aa tel tik ah amah tein tlak si loin Missile in kah ruang ah a tlami a si kho, tiah ruahnak a hun chuak.

US rampi runvennak zungpi Pentagon zong nih, “Russia ser missile nih Iran nih hi vanlawng hi ral vanlawng ah ruat in kap sual sehlaw a dawh,” tiah a ruahnak a langhter.

A tlami vanlawng hi US ah hram a bunhmi Boeing company ser “Boeing 737-800” a si i, vanlawng mongtu khaan ah an chiah tawnmi aw-khumhnak kuang (Black Box) hi Boeing company sin ah ap i hlathlainak tuah ding a si nain cucu Iran cozah nih US ah a ummi company sin ah Black Box kan pe lai lo, tiah an al.

Vanlawng a tlak caan hi Iran nih Iraq ah a ummi US ralkap vanlawng hmunkhuarnak Missile in a kah hnu tlawmpal ah a si.

Ukraine cozah nih ahmasa ah cun a seh a rawh ruang ah a tla tiah cathanh an chuah ve nain cu cathanh cu an let tthan i, “Ralhrang nih kah ruang ah (asiloah) Missile in an kah ruang ah a tlami a si kho,” tiah an langhter tthan.

Hi vanlawng hi Ukraine ram khualipi Kiev lei ah a zuangmi a si i, vanlawng a tlaknak hmun ah hlathlainak tuah ding in Ukraine cozah nih Iran cozah sin ah nawl a hal. Iran nih nawl a onh le onh lo a fiang rih lo.

Cherhchan: Fox News

Latest News

News in Burmese