Minister Pau Lun Min Thang: Cozah Caah a Thahnemmi Quality a Ngeimi Media Pawl Conglawmhnak Pek Ding in Timhlamhnak Kan Ngei

| The Chin Journal | Hakha, Chin State

Kan ram chung thil cang thawng dikhmaan tampi tial le mipi caah thathnemnak a petu Media pawl kanmah cozah lei in conglawmhnak pek ding in timhlamhnak kan ngei tiah ramkulh cozah zung meeting khan i tuahmi Media le cozah tonpumhnak ah Social Minister Pau Lun Min Thang nih a chim.

“Media hna nih khua kilken tiang i a ummi khuami pawl an harnak kong langhter zungzal i cozah caah bawmchantu, thathnemnak a petu Media phu hna cu a si khawh chung in thangthat conglawmhnak pek kan timh hna. Kapkhatlei in chim ahcun laksawng peknak zong tuah ding in khua kan khan lio a si” tiah Minister Pau Lun Min Thang nih a chim.

“Quality ngei te le dawtnak he a tuanmi Media cu tangthatnak pek tlak an si bantukin that lonak leikap in a tuanmi Media tu cu upadi a um caah a si khawh chung in zohfel kan zuam lai” tiah a chim chap.

Media nih harnak nan tonmi kong kan sin ah chim khawh a si, cozah kong he pehtlai in nan hngalh khawh lomi thil tete a um si ahcun kanmah he ceihhmainak ngeih hnu ah nawl kan onh khawh tawk kan langhter lai. Media a nun khawh nakhnga, tangka a hmuh khawh nakhnga cawngia zong in siseh kan i bawmhchanh a si ahcun Media caah thathnemnak a um bantuk in acozah ca zong ah thathnemnak tampi a peklai tiah Minister Pau Lun Min Thang nih a chim.

Media hna nih biaknak kong siseh, politics kong siseh ca nan tial tik ah Media zulhphung kha hmai ah chiah in tlukruang te le thil dikhmaan ning in a phuang khotu Media si ding in forhfial kan duh hna tiah a chim chap.

“Cozah lei zong nih thawngpang a chuah caan poah ah kanmah he pehtlaihnak a um maw um lo, zei tluk in dah thawng dikhmaan a si timi pawl chekhlainak kan tuah cuahmah lio caan a si. Cozah caah thlalang (mirror) si awk a si ko nain, cozah caah hramhram in chiatnak lei lawng a phuangtu Media pawl nihin tiang ah a zizutnak kan tuahmi an um rih lo. Hi zong hi hmailei ah cun a si khawh chung in zohfelnak tuah kan herh te men lai. Cu bantuk a si lawnglawng ah quality a ngeimi Media tiah thangthat awk tlak an si lai” tiah Minister Pau Lun Min Thang nih a chim.

Latest News