Mindat: Inn Kanghnak ah aa Tel Chih Tiah Ruahdamhmi Tang 5 Siangngakchia Pa Nungdam in an Hmuh Than Cang

| The Chin Journal | Hakha, Chin State

March 22, zaan suimilam 11:00 hrawng ah Chin ramkulh Mindat khua ah inn 4 mei a kaang. Cu chung ah cun tang 5 siangngakchia pa an hmuh ti lo ruang ah mei nih a kangh chih tiah ruahdamh a si.

Asinain, mei a kangh lio ah hin a pi inn ah a rak um tiah khuami pakhat nih a chim.

Hi kong he pehtlai in Mindat khua um minung pakhat nih “Tang 5 a cawngmi siangngakchia¬† a si, an inn a kangh lio ah hin a nu le a pa cu an tli. An fapa te cu a nulepa hlan ah a zaam cang, an fapa cu an hmuh than cang, a nutu cu mei nih tlawmpal a kangh. Nain a thih cu a thi lo” tiah The Chin Journal ah a chim.

“Mei a kangh lio ah hin ngakchia pate cu a pi inn ah a rak zaam diam cang. An chungkhar sin a um ti lo ruang ah mei nih a kangh chih tiah an ruahdamhmi a si” tiah a chim

Mindat khuami a dang minung pakhat nih The Chin Journal biahalmi chung in March 22, sml. 11:45pm hrawng ah hitihin a chim “Kan umnak he cun aa hlat ngai, inn 4 a kaang. Atu zong mei a kangh cuahmah lio ka hmuh ko, nitlak lei sang khuabawi pa inn in meikangh hram aa thok. Khuabawi pa min belte ka fiang ti lo, atu cu tlawmpal meikangh a dai deuh cang, tu nai lei cu a kangh ning a fak tuk, meithat mawtaw zong tam ngai a um” tiah a chim.

Meikanghnak ah aa tel tiah ruahdamhmi ngakchia pa hi Mindat khua um U Pau Thang Naing fapa kum 10 ngakchia a si tiah thawng kan theih.

Photo: Vakok Voice

Latest News