Mindat-CDF le SAC Ralhrang Hmun 2 ah an i Kap, CDF lei Hliampu/Mithi Um Lo

| The Chin Journal | Hakha, Chin State

Nihin (July 21) zaanlei sml. 3:00 tiang ah Mindat-CDF le SAC ralhrang karlak kahdohnak voi 2 a chuak, tiah thawng kan theih.

Zinglei sml. 6:45 hrawng ah Chin ramkulh le Magwe ramri, Shwedwin Too khuate pawng ah a voi khatnak an i kap.

Shwe Taung Tha khua in Mindat lei ah SAC ralhrang pawl motor in an rak rat caah ramri ah kahdohnak a chuah hi a si.

Sml. 3:00 hrawng ah SAC ralhrang motor 16 cu Mindat lei ah an kai thluahmah, tiah Mindat zatlangbu rianttuantu pakhat nih a chim.

Motor 16 in a rak rami SAC ralhrang pawl hi Pakoku hrambunh SAC Battalion No. 101 an si.

Kahdohnak a thar in a chuah tthanmi kong he pehtlai in Mindat mipi uktu bu ah ttuanvo ngei upa pakhat nih, “Abikin, kap hnih ceihmainak a tlamtlin lo ruang a si ko. Kanmah nih kan halmi le anmah lei nih an duhmi aa dang tuk,” tiah RFA ah a chim.

Zinglei ah Magwe-Chin ramri ah an i kah hnu ah chun sml. 12:00 hrawng ah Mindat he meng 30 hrawng a hlatnak khuate pakhat pawng ah an i kap tthan.

Khuami 200 hrawng zong kahdohnak ruang ah hmundang ah an zaam dih hna, tiah a cunglei upa nih a chim.

Nihin nikhat chung hmun hnih an i kahnak ah Mindat-CDF lei in a thimi le hliam a pumi an um lo.

SAC ralhrang lei tu in a thimi le hliam a pumi an um nain dikthlir in thil sining kan theih kho rih lo, tiah a cunglei upa nih a langhter chap.

Atu tiang ah SAC ralhrang nih thazaang an chap cuahmah caah Mindat peng ah kahdohnak hi pehzul in a fak kho, tiah an ruahdamh.

Mindat ralzaam bawmhnak a petu UNHCR motor pawl an kir hnu a nikhatnak ah SAC ralhrang nih thazaang tampi in Mindat khua an kal hnawh hi, kahdohnak a hun chuah tthan hi a si.

Advertisement

Thawngpang Thar