Melbourne Sathahnak Rianttuan Laimi (5) COVID-19 Zawtnak an Ngei

| The Chin Journal | Hakha, Chin State

Australia Ram, Victoria ramkulh ah COVID-19 zawtnak a ngeimi minung 22 an hmuh chap hna i, cu chung ah cun Laimi minung 5 an i tel, tiah theih a si.

COVID-19 mziaw minung 22 chung ah minung pahnih hi ramleng khuatlawnnak in a rak kirmi an si i, Quarantine ah an chiahmi hna an si.

Cun a dang 19 hi Nitlak Melbourne ah a ummi sathahnak company (Cedar Meats Australia) ah rian a ttuanmi an si. Cu 19 chung ah cun kanmah Laimi panga an i tel ve hi a si.

Victoria ramkulh ngandamnak lei lutlai nih cun minung 19 zawtnak an i chonhnak hmun hi a company min a langhter lo nain ABC News nih an van hlat tikah Nitlak Melbourne, Brooklyn ah a ummi Cedar Meats Australia a si, tiah a hun langhter.

Company lei tuanvo ngeitu nih an chimnak ahcun rianttuantu chung ah minung 4 hi tuan deuh ah khan damlo in an rak um, tiah an thanh.

Mah hnu ah sathahnak company le Victoria ramkulh ngandamnak lei ttuanvo latu hna nih May 1 ah khan minung 350 cu an zawtnak an check hna i, sathahnak ah minung 19 cu COVID-19 zawtnak an ngeihmi an hmuh hna.

Atu zawtnak thawngpang thar kong he pehtlai in Victoria ramkulh uktu a simi Andrew nih, “Nizan ah minung 13,000 cu an check khawh cang hna. Cozah nih aa tinhmi cu Victoria pengkulh chung State Emergency a thanhmi a dih hlan May 11 hlan chung hrim ah minung 100,000 cu an zawtnak zohfel kan i zuam lai,” tiah a chim.

Acozah lei nih Victoria ramkulh chung ah hin minung 56,000 cu ngandamnak an check cang hna i, an result a fiang lomi zong tampi an um rih.

Victoria ramkulh chung ah COVID-19 zawtnak ngeih le ngeih lo zohfelnak hmun 90 an ser i cuka hmun cun an zohfel hna, tiah theih a si.

Note: Hi Thawngpang hi Australia ram, Melbourne hrambunh Chin Broadcasting Network (CBN) nih Victoria chung Laimi COVID-19 a ngeimi kong hlathlainak a tuah hnu ah a ttialmi a si. Thawngpang chung i acheu data hi nihin ah ABC News nih a tarmi pawl zong an i tel. CBN le The Chin Journal thawngpang i hrawmnak in kan vun tarchinmi a si.  

Latest News

News in Burmese