Mekuang Khat ah aa Rak Zuammi JP Biak Tin Sang Le VP Henry Van Thio an i Tong

| The Chin Journal | Hakha, Chin State

2015 thimnak lio ah Thantlang mekuang khat ah a rak i zuammi JP Biak Tin Sang le Myanmar Vice President Henry Van Thio cu September 1 ah an i tong, tiah thawng kan theih.

Yangon ramthen, Hmawbi ah a ummi JP Biak Tin Sang te i ngaktah sianginn ah Henry Van Thio le a nupi Dr. Anna Sui Hluan nih lenkainak an vung ngeih hna i cuka hmun ah cun Pu Biak le Henry Van Thio an i ton hi a si.

Photo – Beechy

JP Biak Tin Sang nih, “Kannih pahnih cu ram thanchonak ca ah riantuan a duhmi kan si caah kan rak i zuam liote ah khan na ka tei cun kan bawmh lai, kan tei cu na ka bawmh ve lai kan rak i ti. Vice President a si kaa ah khan kan sin ah len ding in timhtuahnak a ngei ko nain rian manh lo tuk a si caah atu hi caantanh tein amah pumpak in a kan veh hi a si,” tiah a chim.

Photo – Beechy

Nizan ah i ton lio ah Rakhine ram ah a ummi Chinpung tiah timi Chin miphun hna ca ah le Thantlang peng, Vailam Tlang le Zahnak Tlang karlak lamsul kong Pu Biak nih Henry Van Tho biaruahnak zong a ngeih.

Henry Van Thio le Dr. Anna nih pumhnak a rak chuak khomi hna thazaang pek biachimnak le ngaktah hna sin laksawng peknak zong an ngeih hna.

Henry Van Thio te cu JP Biak Tin Sang te sin ah suimilam pakhat leng caan an hman hna ah innlei ah an panh than, tiah theih a si.

Latest News