Manipur Tiva ah a Tlami Ngakchia Pahnih Ruak an Hmuh Cang

| The Chin Journal | Hakha, Chin State

Falam khua pawng, Minipur tiva ah May 21 zanlei sml. 2:00 hrawng ah a tlami ngakchia pahnih hna i an ruak cu nihin zinglei ah an hmuh cang hna, tiah theih a si.

Kum 14 a simi Van Ni Piang le kum 13 a simi Lal Rin Sang cu nizan ah kha ngatlaih ding in kum 16 a simi an hawi Sangte le Sangte i a pa Pu Van Run Piang he Manipur tiva ah an rak kal hna.

Tiva in an tlun lai ah ti an i lio ta i Sangte, Van Ni Piang le Lal Rin Sang cu ti chung ah an tla.

Pu Van Run Piang nih khamh ding in aa zuam hna nain Sangte lawng a khamh khawh manh i a dang ngakchia pahnih cu an nunnak a liam thai.

Nizan ah an ruak an kawl hna nain an hmu hna lo. Atu zing sml. 6:00 ah an ruak hi an hmuh hna. An tlaknak ti chung ah an rak tarhmi ngatlaihnak peih/net ah an rak taang.

Aluancia May 1 zong ah khan Falam khuachung i Thaal caan Mirang cacawnnak sianginn ah a kaimi siangngakchia pawl Manipur tiva ah picnic an rak kal i, ngakchia pathum tii ah an rak paam ve cang.

-Zalen

Latest News