/

Manh Caan Poah ah Lairam Ca ah Rian a Tuantu VP Henry Van Thio

The Chin Journal | Hakha | Chin State

Naypyidaw i Vice President Henry Van Thio innchung ah pe 25 velchum hrawng a kaumi zungkhaan pakhat a um i, cu zungkhaan chung ah hun luh lecangka in Map/Mepung pawl kan i lamh dih colh.

Vice President Henry Van Thio zungkhaan

Aruang cu zungkhaan zelttuang cung ah Vinyl in sermi Map/Mepung lawngte khat tthup in an i phah caah a si; kee chiahnak um lo tluk in zelttuang hmunhma an lak dih.

Zelttuang cung lawng ah si loin zungkhaan chung i vanpang hnget in mepung an thlaimi mepung pawl hi a tam taktak rih.

Vice President Henry Van Thio zungkhaan
Vice President Henry Van Thio zungkhaan

Cu zungkhaan chung i mepung pawl cu ttha tein hun zoh tik ah Chin ramkulh chung ah atulio cozah nih a ttuan cuahmahmi rianhmun pawl lawngte an si.

Tahchunhnak ah: atulio Paletwa pawng ah ttuanmi Kaladan Project, Laymyo Hydro Electric Project, Saisih chuak lam, Chinram Nithlang le Nichak a pehtlaihtu lam, Mizoram-Chinram karlak Tio Tiva hlei, Mizoram le Paletwa karlak motor lampi, Kaladan tiva hlei, Leium Cement sehzung saknak hmun tibantuk telh in a dangdang Chinram chung ah rian an ttuan cuahmahmi le an ttuan dingmi hmunhma a hmuhsaktu mepung hi a fa in a ngan tiang an tling khitkhet dih.

Vice President Henry Van Thio zungkhaan
Vice President Henry Van Thio zungkhaan

Pehtlaihnak lam le sul le a dangdang project pawl lawng si loin atu cozah chan ah Chinram ah khuapi/myo an pekmi khua pawl mepung zong tling hirhiar in an lang dih.

Cucaah, hi zungkhaan ah hin vun luh i a pawngkam mitsir thlak tik ah a langhlat in Lairam cuanhnak thlalang (asiloah) durbing bantuk a si timi feeling ngeih colh khawh a si.

Vice President Henry Van Thio zungkhaan
Vice President Henry Van Thio zungkhaan

Hi zungkhaan chung ah hin Laitlang mepung dahtilo a dang ramkulh mepung cu pahnih lawng an um–Kaya ramkulh mepung pakhat le Kachin ramkulh mepung pakhat lawng an si. A dang vialte cu Chin ramkulh chung rian an ttuannak mepung lawngte an si.

Vice President nih thatho ngaiin cu mepung pawl cu pakhat hnu pakhat in a kan hmuhsak. Vanpang hriang ah an tunmi mepung pawl a hei banh chel, zelttuang ah an phanh mepung pawl kun buin a hun kan hmuhsak chel tiin suimilam pakhat caan a liam manh hmanh theih a si lo.

“Hi zungkhaan hi Lairam ca rianttuannak hrimhrim ah ka hmanmi a si. Zung in ka ttin hnu kaa manh caan paoh ah hika zung khaan ah hin caan ka hmang tawn,” tiah Vice President nih a chim.

Note: December 2019, Vice President runinn ah tuahmi Christmas puai kal lio ah hmuhtonmi ka Dairy chung in langhtermi a si–(Salai Zing Bawi)

THAWNG THAR

The Chin Journal Internship Program ah Thantlang, Hakha le Falam ah a ummi paoh i tel khawh a si. Hi Internship Program ah i tel na duh ahcun APPLICATION FORM hi phi ve.