Malaysia Lockdown Chung Tlaihmi Hna Lak ah Chinmi 70 Leng an i Tel

| The Chin Journal | Hakha, Chin State

Malaysia ram ah COVID-19 Lockdown caan chung ah ramdangmi 3,000 hrawng an tlaih hna i cu chung ah cun Chinmi 70 leng an i tel, tiah theih a si.

COVID-19 caan chung ah Malaysia nih ramdangmi rianttuantu pawl luhnawhnak le tlaihkhihnak a tuahmi kong ah UN nih mawhchiatnak zong a tuah ve.

Malaysia ah phungning loin a um i Lockdown chung ah tlaih a tongmi pawl hi caan sau nawnpi hren an si hnu ah anmahle ram ah kuat tthan ding in Malaysia cozah nih timhtuahnak a ngei.

Malaysia thawngzamhnak NST nih a langhter ning ah “UNHCR nih Malaysia MCO (Movement Control Order) caan chung ah ralzam tlaihmi an um lo tiah a ti nain a tlawm bik Chinmi 73 tlaih a tongmi an um,” tiah a ti.

“Tlaih a tongmi Chinmi hna nih an phan bikmi cu saupi hren an ton hnu ah an ram lei ah kuat an i huah lai ti hi a si,” tiah NST nih a langhter chap.

Minung tampi a bu in an chiah hnannak Immigration Detention Center pawl ah COVID-19 mizaw zong hmuh an hun si tik ah tlaih a tongmi ramdang rianttuanmi hna ca ah thinphang ngaingai a hun si chap.

Tlaihmi pawl an hren hnanak Kuala Lumpur khuahriang i Bukit Jalil Detention Center le Selangor i Semenyih Detention Center ah COVID-19 zawtnak a ngeimi kan hmuh hna, tiah Malaysia ram ngandamnak zung Director-General Noor Hisham Abdullah nih May 22 ah a chim.

“Semenyih ah minung 2 COVID-19 zawtnak a ngeimi kan hmuh hna. Cun, Bukit Jalil ah minung 60 COVID-19 zawtnak an ngei,” tiah Noor Hisham Abdullah nih a chim.

“Cucaah, Detention Center pahnih ah a ummi vialte ngandamnak zohfelnak tuah ding in timhtuahnak kan ngei. An zapi tein kan zohfel hna lai i, phungninglo pawl cu anmahle ram ah kan kuat tthan hna lai,” tiah a chim chap.

Bukit Jalil Detention Center ah hin atulio an tlaihmi ramdangmi 1,200 hrawng an hren hna i, Semenyih ah hin milu 1,600 hrawng an hren ve hna, tiah theih a si.

Malaysia rampi huap in COVID-19 zawtnak a ngeimi minung 7,200 leng hmuh an si i, cu chung ah cun May 24 tiang ah minung 115 an nunnak a liam.

Cherhchan: NST, Channel News Asia, Xinhua

Latest News

News in Burmese