Malaysia Khrihfabu Thiltuah Nih Malay Rammi Lung a Hmuihter| Video

| The Chin Journal | Hakha, Chin State

Malaysia ram, Sabah ah a ummi Khrihfabu pakhat nih Muslim puai sunglawi a simi Ramadan caan ah Muslim chawdawr kaltu hna ca ah thil a tuahpiakmi hna nih Malay Muslim mipi lung a tongh ngaingai, tiah theih a si.

Sabah ramkulh, Bukit Padang khua ah a ummi Church of Mary Immaculate Khrihfabu nih Muslim puai sunglawi Ramadan caah motor fimnak hmun a onpiak peng hna.

Pawngkam ah dawr a kaltu Bukit Padang khuami an tam tuk tikah motor fimnak ah harnak an tong zungzal. Cucaah, Khrihfabu nih cun a biakinn kutka a onpiak hna i alak tein biakinn tual chung ah motor fimnak hmun a pek hna.

Hi Khrihfabu nih atu bantuk in thil a tuah hi aluancia kum 6 thawk khan a rak si cang.

Muslim puai sunglawi Ramadan cu May 5 in aa thawk i June 4 ah a dih te lai. Hi caan chung vialte hi Church of Mary Immaculate nih motor fimnak alak in a tawlrelpiak hna.

Bukit Padang ah Khrihfabu nih atu bantuk in thil dawh ngai a tuahmi kong cu dawr a kalmi Muslim pa nih video a thlak i, “Biaknak kan i dan zong ah hmun khat ah daw tein kan um cun thluachuah a tlung ko,” tiah a tial.

“Biaknak dang hna karlak ah pakhat le pakhat daw le rem tein khuasaknak hi hmun tampi ah ka hmuhton. Sabah ah hi bantuk thil sining ka ngeih khawhmi hi hmun zungzal seh ti ka duh,” tiah a tial chap.

Cun, Muslim si le si lo hi abiapimi a si lo. Pakhat le pakhat kan khingrit kan i chawn hi a rak biapi bik ko. Hmunkhat um ti le khuasak tinak nih thluachuah a hruai, tiah a langhter beet.

-CCN

Latest News