Malaysia in a Rak Tlung Lainu Covid-19 Zawtnak a Ngei Lo

| The Chin Journal | Hakha, Chin State

Malaysia in Myanmar ram ah a rak tlung i, Coronavirus a ngeih le ngeih lo check ding in sizung ah an kalpimi kan Lainu cu checknak an tuah hnu ah zawtnak a ngei lo, tiah theih a si.

March 6 zinglei sml. 10:00 ah Malaysia in Yangon International Airport ah a rak phanmi Hakha nu (kum 30) cu Coronavirus a umnak ram in a rak tlungmi a si caah checknak tuah ding in Yangon khua i Wai Baw Ki sizungpi ah an chiah.

Checknak tlamtling in an tuah hnu March 9 ah Hakha nu telh in a dang an checkmi minung (6) cu Coronavirus an ngei lo, tiah Myanmar ngandamnak zung nih thawng a thanh.

Myanmar ah ramleng in a rak tlungmi pawl Coronavirus an ngeih le ngeih lo check ding in sizung ah an chiah chungmi minung 70 leng an um i, cu chung ah cun Coronavirus zawtnak an ngei kho tiin special in an zohkhenhmi minung (6) an um, tiah theih a si.

Latest News

News in Burmese