Mah Lungtho in Inn a Thettu Cozah Nih Hmun Tawlrelpiak Lai

| The Chin Journal | Hakha, Chin State

August 19 ah Hakha khuasamhnak kong he pehtlai in Chin ramkulh cozah nih Media sin ah thil sining fianternak a tuah i khuasamh timhnak hmun chung ah phungning loin inn a satu hna nih anmah tein inn an thet a si ahcun innhmun kong ah acozah lei nih a tawlrelpiak hna lai, tiah Chin ramkulh sipin vuanci U Soe Htet nih a chim.

“Anmah lungtho tein an theh a si ahcun acozah zong nih bawmhnak can ah hmun kan pek than ko hna lai. Hi khuasamhnak rian hi acozah nih dingrep tein a tawlrel i a tuahmi a si. Committee tha tein kan ser i atu in cun kum 1 hmanh a rau cang,” tiah U Soe Htet nih a chim.

Mah lungtho in inntheh a duhmi dawng 8 an um i dawng hnih tu cu caankarlak chung chungkhar sin ah um chung an i tim. A dang dawng 6 hi Cawbuk lam ah umnak acozah nih an tawlrelpiak chung hna lai i, hmunsamhmi chung ah rianrang in an i thial khawh nakhnga acozah lei in kan zuampiak hna lai, tiah a chim chap.

Sihmanhsehlaw, August 20 ah acozah nih a thehpiakmi hna cu an innhmun zong cozah ta lawngte a si cang lai, tiah August 15 ah khan Pu Sui Thio nih a rak chim.

Hakha, Cawbuk sang ah Chin ramkulh cozah nih Hakha khuasamhnak a tuahmi acre 676 chung phungning lo inn 130 an um i August thlathawh lei ah theh viar ding acozah nih a timhtuah nain Hakha khuachung bu kip pastorte hawikomhnak bu nih acozah an ton hna hnu ah August 20 ah hrawh ding in nicaan an thawn hi a si.

Latest News